बलात्कारको अभियुक्तलाई कुनै खालको उन्मुक्ति सह्य हुँदैन : पूर्णबहादुर खड्का

२१ माघ, काठमाडौं । नेपाली कांग्रेसका उपसभापति पूर्णबहादुर खड्काले बलात्कारको अभियोग लागेका सन्दीप लामिछानेलाई राष्ट्रिय क्रिकेट टिममा सहभागी गराउनु गलत भएको बताएका छन् ।

शनिबार सामाजिक सञ्जाल ट्वीटरमा उनले लेखेका छन्, ‘बलात्कारको अभियोग वा कुनै पनि अभियोग लागेको ब्यक्तिलाई कुनै पनि खालको उन्मुक्ति दिने कुरा ग्राह्य हुन सक्तैन । सम्बन्धित संस्थाको तत्काल गम्भीर ध्यान जाओस् ।’

लोकप्रिय भएको वा कुनै नाममा उन्मुक्ति दिन नपाइने पनि बताए । ‘कोही नेता लोकप्रिय होलान्, कोही कलाकार लोकप्रिय होलान्, कोहि खेलाडी लोकप्रिय होलान्,  यो बेग्लै कुरा हो’ खड्काले भनेका छन् ।

बलात्कारको अभियोग काठमाडौं जिल्ला अदालतमा विचाराधीन रहेकै बेला क्रिकेटर सन्दीप लामिछानेलाई नेपाल क्रिकेट संघले नेपाली राष्ट्रिय टिममा फर्काएको छ ।