२०७९ माघ २७ गते १३:२५ 
२७ माघ, काठमाडौं । पेरिस सेन्ट जर्मेन पीएसजीका फरवार्ड लियोनल मेस्सीले चोटका कारण च्याम्पियन्स लिगमा बायर्न म्युनिखविरुद्धको प्रि–क्वाटरफाइनलको पहिलो लेग गुमाउने सम्भावना रहेको छ ।
ह्यामस्ट्रिङ चोटका कारण यस हप्ताको खेल उनले गुमाउन सक्ने पीएसजीले जनाएको छ ।
पीएसजी र बायर्नबीचको च्याम्पियन्स लिगको पहिलो लेग पीएसजीको मैदानमा १४ फेब्रुअरीमा र दोस्रो लेग बायर्नको मैदानमा ८ मार्चमा हुँदैछ ।
कप डि फ्रान्सको प्रि–क्वाटरफाइनलमा मार्सेसँग २–१ ले पराजित भएको खेलमा मेस्सीले ह्यामस्ट्रिङको समस्या भोगेका हुन् ।
मार्काका अनुसार मेस्सीले यसै साता मोनाकोविरुद्ध हुने फ्रेन्च लिग वानको खेल पनि गुमाउने छन् ।
विश्वकप विजेता अर्जेन्टिनी कप्तान मेस्सी बायर्नसँगको च्याम्पियन्स लिगको दोश्रो भिडन्ता लागि भने टोलीमा फर्कने सम्भावना रहेको पीएसजीले बताएको छ ।
मेस्सीको चोटले पीएसजीलाई संकट
प्रशिक्षक क्रिस्टोफ गाल्टियरलाई मेस्सीले चोटले थप जटिलता थपेको छ ।
पीएसजीले यसअघि चोटकै कारण फ्रेन्च फरवार्ड केलियन एमबाप्पेलाई गुमाइसकेको छ ।
उनी तिघ्राको चोटका कारण एक महिना मैदान बाहिर छन् । उनी बायर्नसँगको दोस्रो लेगमा फर्कने अपेक्षा गरिएको छैन ।
जसका कारण पीएसजीले पहिलो नकआउट खेलमा दुई महत्वपूर्ण खेलाडीहरु बिना खेल्नु पर्ने हुन सक्छ ।
प्रतिक्रिया 4