स्मार्टफोनको स्क्रिन बन्द गरेर युट्युब भिडियो कसरी चलाउने ?

काठमाडौं । भिडियो स्ट्रिमिङ प्लाटफर्म युट्युब सन् २०२२ मा विश्वमा सर्वाधिक डाउनलोड हुने मनोरञ्जन एप बन्न सफल भएको छ । विश्वभर सन् २०२२ मा युट्युब एप १५ करोड ४० लाख पटक डाउनलोड भयो ।

गुगलको तथ्यांक अनुसार युट्युबका आधिकारिक मासिक प्रयोगकर्ताको संख्या २ अर्ब भन्दा धेरै छ । विश्वका १ सय भन्दा धेरै देशमा ८० वटा भाषामा युट्युब उपलब्ध छ । युट्युबमा हरेक मिनेटमा ५ सय घण्टाको भिडियो सामाग्रीहरु अपलोड हुन्छन् ।

बजार तथा उपभोक्ता सम्बन्धी डाटा तयार गर्ने प्लाटफर्म स्टाटिस्टाको तथ्यांक अनुसार युट्युब प्रयोगकर्ताको संख्याका हिसाबले भारत सबैभन्दा अगाडि छ । भारतमा युट्युबका प्रयोगकर्ताको संख्या ४६करोड ७० लाख छ । विश्वमा युट्युबको सशुल्क सेवाग्राही अर्थात् प्रियिमम सब्सक्राइबरको संख्या ८ करोड पुगेको छ ।

यसको अर्थ युट्युबमा शुल्क तिरेर भन्दा निशुल्क प्रयोग गर्ने प्रयोगकर्ताको संख्या अत्यधिक छ । यद्यपि युट्युबको सशुल्क भर्सनमा विभिन्न नयाँ नयाँ तथा उपयोगी फिचरहरु उपलब्ध हुन्छन्, जुन आम नि:शुल्क प्रयोगकर्ताले प्रयोग गर्न पाउँदैनन् । त्यसमध्ये एउटा उपयोगी फिचर चाहिँ डिभाइसको स्क्रिन बन्द गरेर पृष्ठभूमिमा भिडियो चलाउने हो ।

युट्युबको सब्सक्रिप्सन भर्सनमा प्रयोगकर्ताले युट्युब एपलाई मिनिमाइज गरेर पनि भिडियो चलाउन सक्दछन् । यद्यपि युट्युबको प्रिमियम सेवा खरीद नगरीकन पनि यो सुविधा लिन सकिन्छ । स्मार्टफोनको स्क्रिन बन्द गरेर युट्युबमा भिडियो चलाउने सशुल्क र नि:शुल्क तरिका यी हुन्ः

प्रिमियम सब्सक्रिप्सनबाट 

• आफ्नो एन्ड्रोइड वा आइओएस फोनमा युट्युब एप खोल्नुहोस्
• आफूले चाहेको जुनसुकै भिडियो चलाउनुहोस् र फोनको स्क्रिन अफ गर्नुहोस्
• तपाईंले यसो गर्दा पनि युट्युबमा भिडियो चलिरहन्छ, बन्द हुँदैन
• युट्युबको प्रिमियम भर्सनमा तपाइँले एपलाई मिनिमाइज गरेर पनि भिडियो चलाइरहन सक्नुहुन्छ ।

प्रिमियम सब्सक्रिप्सन बिना नै ब्याकग्राउण्डमा युट्युब भिडियो चलाउने तरिका

हुनत स्क्रिन अफ गरेर ब्याकग्राउण्डमा युट्युब भिडियो चलाउन सकिने फिचर केवल प्रिमियम भर्सनमा मात्र उपलब्ध छ । तर तपाइँले एउटा तरिका अपनाएर  निशुल्क रुपमा पनि यो फिचर प्रयोग गर्न सक्नुहुन्छ । त्यसका लागिः

• आफ्नो स्मार्टफोनमा वेब ब्राउजर खोल्नुहोस् र Youtube.com टाइप गरी युट्युबको वेब भर्सन लगअन गर्नुहोस्
• तपाईंले ब्याकग्राउण्डमा सुन्न चाहेको भिडियो खोज्नुहोस्
• भिडियो चल्न सुरु भएसँगै डेस्कटप मोडमा जानुहोस् र पुनः भिडियो चल्न सुरु हुँदासम्म पर्खिनुहोस्
• त्यसपछि ब्राउजर मिनिमाइज गर्नुहोस्, जसले भिडियो रोकिन सक्दछ ।
• यदि तपाईंले एन्ड्रोइड फोन प्रयोग गरिरहनुभएको छ भने प्लेब्याक नोटिफिकेसनको नोटिफिकेसन प्यानललाई swipe down  गरी Play बटनमा ट्याप गर्नुहोस् ।
• आइओएस र आइप्याड डिभाइसमा चाहिँ control center खोल्नुहोस् र त्यहाँ रहेको म्युजिक संकेत चिन्हको Play बटनमा ट्याप गर्नुहोस् ।
• त्यसपछि ब्याकग्राउण्डमा भिडियो बज्न सुरु गर्दछ ।

– एजेन्सी