मेयर कप भलिबलमा एपीएफ र आर्मीको विजयी सुरुवात

१० वैशाख, काठमाडौं । मेयर कप खुल्ला महिला तथा पुरुष भलिबल प्रतियोगिता अन्तर्गत महिलातर्फ दुई विभागीय टवली एपीएफ क्लब र त्रिभुवन आर्मी क्लबले आइतबार विजयी सुरुआत गरेका छन् ।

ललितपुरको जावलाखेल भलिबल प्रशिक्षण केन्द्रको कभर्डहलमा आइतबार एपीएफले आयोजक ललितपुर महानगरपालिका सिटीलाई ३-० को सेटमा हराएर सुखद सुरुआत गरेको हो ।

एपीएफले ललितपुरलाई २५-६,२५-७,२५-१४ को सेटमा सहजै हरायो ।

यस्तै आर्मीले कोटेश्वर मल्टिपल क्याम्पसलाई ३-० को सेटमा हरायो । आर्मीले कोटेश्वरमाथि २५-६,२५-४ र २५-५ को सेटमा जित निकाल्यो ।

पुरुषतर्फ ललितपुर महानगरपालिका सिटी र नेपाल गणतान्त्रिक खेलकुदले जित निकालेका छन् ।

ललितपुरले बोगटी समाज ललितपुरलाई २५-२०,२५-१८ र २५-१९ ले हराएको हो । नेपाल गणतान्त्रिकले पाटन मल्टिपल क्याम्पसलाई २५-१२, २५-२० र २५-१५ ले हराएको छ ।

ललितपुर महानगरको आयोजना र जावलाखेल भलिबल प्रशिक्षण केन्द्रको ब्यवस्थापन रहेको प्रतियोगितामा ८ पुरुष र ७ महिला गरि १५ टिम सहभागी छन् ।

प्रतियोगिताको विजेता टिमले समान दुई लाख, उपविजेताले एक लाख र तेस्रो हुने टिमले ५० हजार रुपैयाँ प्राप्त गर्ने छन् ।