२०८० जेठ ७ गते १४:०९ 
७ जेठ, काठमाडौं । प्रिमियर लिग क्लब आर्सनलका गोलकिपर आरोन राम्सडेलले आर्सनलले अब ऐनामा हेर्नुपर्ने र आफ्नो गल्तीहरु स्वीकार गर्नुपर्ने बताएका छन् ।
आर्सनलले आफ्नै गल्तीका कारण म्यानचेष्टर सिटीलाई उपाधि जित्न सहयोग गरेको भन्दै अब आर्सनलले गल्ती स्वीकार गर्नुपर्ने बताएका हुन् ।
सन् २०१७ पछि पहिलो पटक च्याम्पियन्स लिगमा छनोट हुन सफल हुनुमा गर्व लागेको बताए ।
झण्डै २५० दिन शीर्ष स्थानमा रहेको आर्सनलले सिजन अन्तिमतिर लय कायम राख्न सकेन । शनिवारराति नटिङहम फरेस्टसँग आर्सनल १-० ले पराजित भएपछि सिटीले तीन खेलअघि नै उपाधि निश्चित गरेको हो ।
राम्सडेलले आफ्नो टोली निराश रहेको भन्दै अब उपाधि चुनौती कसरी पतन भयो भनेर भित्र हेर्नुपर्ने बताए ।
तर २०१६ पछि आर्सनल शीर्ष चारमा पर्नु सकरात्मक भएको उनले बताए । ‘च्याम्पियन्स लिग फुटबल सिजनको सुरुमा पहिलो लक्ष्य थियो । हामीले छ वा सात वर्षमा पहिलो पटक त्यसमा सफल भएका छौं,’ राम्सडेलले भने, ‘हामीले छ वर्षमा पाँच पटक उपाधि जितेको म्यान सिटी टोलीलाई सबै बाटोमा धकेल्यौं ।’
उनले लिग जित्न नसकेको निराशा भन्दा कसरी खेल्दै लिग समाप्त भयो भन्नेमा निराशा रहेको बताए ।
‘हामी आफैंमा साँच्चै गर्व गर्नेछौं, तर हामीले ऐनामा हेर्नु पर्छ र हामीले कहाँ गल्ती गर्यौं भनेर स्वीकार गर्ने पहिलो व्यक्ति हुनुपर्दछ, किनभने त्यसरी नै हामीले कसरी राम्रो गर्ने भनेर सिक्नेछौँ ।’
आर्सनलले अर्को साताको अन्त्यमा वल्भ्ससँग घरेलु मैदानमा खेल्दै सिजनको अन्त्य गर्नेछ ।
दोस्रो स्थान पक्का भइसकेको अवस्थामा अब आर्सनलका लागि केही बाँकी नभएको र आर्सनलको उद्देश्य राम्रो तरिकाले सिजन समाप्त गर्नुमा हुनुपर्ने उनले बताए ।
उनले भने, ‘हामीले हाम्रा समर्थकहरूको अनुहारमा प्रदर्शन र मुस्कान राख्न आवश्यक छ जसका लागि उनीहरु लायक छन् । उनीहरु हामीमा गर्व गर्न सक्छन् ।’
प्रतिक्रिया 4