जाउलाखेल युथ क्लब एपीएफसँग पराजित

१३ जेठ, काठमाडौं । शहीद स्मारक ए डिभिजन लिगमा तेस्रो स्थानको जाउलाखेल युथ क्लब एपीएफ फुटबल क्लबसँग पराजित भएको छ । त्रिपुरेश्वरस्थित दशरथ रंगशालमा भएको खेलमा विभागीय टोली एपीएफले जाउलाखेललाई २-० ले हरायो ।

एपीएफले दुवै गोल पहिलो हाफमा गरेको थियो । विदेशी खेलाडी अर्मान्ड बेउडमले २३औं मिनेटमा गोल गर्दै एपीएफलाई अग्रता दिलाएका थिए । आवास लामिछानेले पहिलो हाफको इन्जुरी टाइममा एपीएफका लागि दोस्रो गोल गरे ।

खेलको ८४औं मिनेटमा एपीएफका कप्तान नविन लामा र जाउलाखेलका अब्दुलाजिज निशानबाएभले रातो कार्ड पाएपछि दुवै टोली दश खेलाडीमा समेटिएका थिए ।

हारपछि जाउलाखेलको उपाधि होडमा धक्का लागेको छ । २२ खेलबाट टोली ३४ अंकसहित तेस्रो स्थानमै छ । एक खेल कम खेलेको लिग लिडर चर्च ब्वाइज भन्दा जावलाखेल ४ अंकले पछि छ ।