सौरभ गांगुलीमाथि बायोपिक फिल्म बन्ने, शीर्ष भूमिकामा रणवीर कपुर

काठमाडौं । भारतीय क्रिकेट टोलीका पूर्वकप्तान सौरभ गांगुलीको जीवनीमा आधारित फिल्म चाँडै नै आउने भएको छ । यो बायोपिक फिल्मको छायांकन यसै वर्षको अन्त्यबाट सुरु हुनेछ । मिडिया रिपोर्टका अनुसार मे २६ मा निर्माता लव रञ्जन र अंकुर गर्ग सौरभ गांगुलीलाई भेट्न कोलकाता गएका थिए ।

इण्डिया टुडेका अनुसार गांगुली र निर्माताबीच फिल्मलाई लिएर विस्तृत छलफल भएको छ । उक्त भेटमा गांगुलीले निर्देशकलाई जीवनका सबैभन्दा रोचक किस्साहरूको बारेमा विस्तृत रूपमा बताएका थिए । बायोपिकका लागि आवश्यक स्क्रिप्ट लेखन पनि भइसकेको छ । पटकथामा गांगुलीको जीवनसँग सम्बन्धित धेरै नसुनिएका र रोचक कथाहरू समावेश गरिएको छ ।

विवरणअनुसार निर्देशकले फिल्ममा सौरभको जीवनलाई बीसीसीआई अध्यक्षको रूपमा प्रस्तुत गर्नुको सट्टा उनको व्यक्तिगत जीवनमा केन्द्रित गरेका छन् । उनको यात्रालाई छायांकनमा जोड दिइएको छ । फिल्मका लागि उनकी पत्नी डोना गांगुलीको संस्करण पनि लिइएको छ ।

फिल्ममा रणवीर कपुर सौरभको भूमिकामा देखिने जनाइएको छ । शीर्ष भूमिकाको लागि आयुष्मान खुरानाको नाम पनि बाहिरिएको छ । फिल्ममा हजुरबुवाको भूमिका कसले गर्ने भन्ने अहिले टुंगो लागेको छैन । इण्डिया टुडेसँग कुरा गर्दै गांगुलीले फिल्मको स्क्रिप्ट लगभग फाइनल भइसकेको बताए । करिब २०० देखि २५० करोड भारुको बजेटमा फिल्म निर्माण हुने जनाइएको छ ।