सर्लाहीमा ११६ किलो गाँजासहित युवक पक्राउ

१० फागुन, जनकपुरधाम । प्रहरीले सर्लाहीबाट ११६ किलो गाँजासहित एक युवकलाई पक्राउ गरेको छ । पक्राउ पर्नेमा पूर्वी नवलपरासी गैडाकोट नगरपालिका ११ का ३० वर्षीय सूर्य परियार रहेका छन् ।

उनलाई प्रहरीले सर्लाहीको बागमती नगरपालिका ३ नयाँ बस्ती चोकस्थित नयाँरोडबाट बागमती प्रदेश ०१–०२६ च ५१५९ नं. को कार र त्यसमा लुकाइ राखेको १० पोका गाँजासहित पक्राउ गरेको हो ।

गाँजा तौल गर्दा ११६ किलो भएको प्रहरीले जनाएको छ । पक्राउ परेका परियारमाथि थप अनुसन्धान गरिरहेको सर्लाहीका प्रहरी प्रवक्ता डीएसपी दीपेन्द्र पञ्जियार थारुले जानकारी दिए ।