प्राप्त उपलब्धिमाथिको प्रहार रोकिएन : महामन्त्री थापा

१२ फागुन, काठमाडौं । नेपाली कांग्रेसका महामन्त्री गगनकुमार थापाले राजनीतिक दलहरूले लडेर ल्याएको उपलब्धिमाथि विभिन्न रूपबाट प्रहार भइरहेको बताएका छन् । उनले यो प्रहारलाई रोक्न सबै राजनीतिक दलहरू मिल्नुको विकल्प नरहेको पनि बताए ।

शनिबार काठमाडौंमा आयोजित सूचना हस्तान्तरण र लोकतन्त्र विषयक अन्तरक्रिया कार्यक्रममा बोल्दै उनले यस्तो बताएका हुन् । भने, ‘राजनीतिक दलहरूले लडेर ल्याएको उपलब्धिमाथि विभिन्न रूपबाट प्रहार भइरहेको छ । सबै दलहरू मिलेर नगएसम्म प्रहारलाई रोक्न सकिँदैन ।’

उनले राजनीतिक दलहरू एकअर्काको आरोप प्रत्यारोपमा उत्रिँदा प्राप्त उपलब्धिमाथि भइरहेको आक्रमण रोक्न ध्यान नपुगेको स्वीकारे । ‘सबै राजनीतिक दल र नेताहरूले मिलेर कसरी प्राप्त उपलब्धिको रक्षार्थ खट्ने भन्नेबारेमा छलफल गर्न जरुरी भयो,’ उनले भने ।