म्यानचेष्टर सिटीले जित्यो प्रिमियर लिगको उपाधि

६ जेठ, काठमाडौं । म्यानचेष्टर सिटीले लगातार चौथो पटक इंग्लिस प्रिमियर लिगको उपाधि जित्दै रेकर्ड बनाएको छ ।

आइतबार भएको अन्तिम खेलमा वेष्टह्यामलाई ३–१ ले हराउँदै सिटीले उपाधि रक्षा गरेको हो । घरेलु मैदान, इत्तेहाद स्टेडियममा भएको खेलमा सिटीले दोस्रो मिनेटमा फोडेनले गोल गरेका थिए भने १८औं मिनेटमा उनले दोस्रो गोल गरे ।

तर पहिलो हाफको अन्त्यतिर गोल गर्दै वेष्टह्यामले खेलमा फर्किने संकेत गरेको थियो । खेलको ५९ औं मिनेटमा रोड्रीले गोल गरेपछि भने सिटी ३–१ ले अगाडि रह्यो ।