‘कमेडी किरो राष्ट्रको हिरो’ टिभी कार्यक्रम आउने

काठमाडौँ । हास्य व्यंग्यमा आधारित टिभी कार्यक्रम ‘कमेडी किरो, राष्ट्रको हिरो’ आउने भएको छ । काठमाडौंमा आयोजित पत्रकार सम्मेलनमा लोगो र प्रोमो सार्वजनिक गरियो ।

देशभरबाट छानिएका २० जना कन्टेन्ट क्रिएटरले उत्पादन गरेका कन्टेन्टलाई टिभीमा प्रसारण गरिने निर्देशक समन अधिकारीले उक्त अवसरमा जानकारी दिए । सबै कन्टेन्ट क्रिएटरलाई मासिक तलबको समेत व्यवस्था गरिने भएको छ ।

‘यो अवधारणा नेपालमा विशुद्ध नौलो हो,’ निर्देशक अधिकारीले भने, ‘यसले क्षमता भएका तर लुकेका कन्टेन्ट क्रिएटरलाई बाहिर आउन मद्दत गर्नेछ ।’ चार किसिमको वर्गीकरण गरेर कार्यक्रमको संरचना बनाइएको र यसबाट कमेडियन उत्पादनको उद्देश्य राखिएको उनले बताए ।

जनता टिभीले प्रसारण गर्ने यो कार्यक्रमले अर्थ उपार्जनमा पनि मद्दत पुग्ने र रोजगारी सिर्जना हुने आशा टेलिभिजनका अध्यक्ष विजय पौडेलले बताए ।

अहिले डिजिटल अडिसन चलिरहेको छ । कार्यक्रमको सञ्चालन कमेडियन दिनेश काफ्लेले गर्नेछन् । सहभागीलाई सन्तोष खनाल, सुदीप खतिवडा र सरोज भण्डारीले प्रशिक्षण दिनेछन् ।