दुर्घटना एकदमै बढ्यो, घटाउनुपर्‍यो : गृहमन्त्री लेखक

१२ भदौ, काठमाडौं । गृहमन्त्री रमेश लेखकले सडक दुर्घटना न्यूनीकरणका लागि सबैले आ–आफ्नो ठाउँमा काम गर्नुपर्ने बताएका छन् ।

बुधबार दिउँसो गृह मन्त्रालयमा सरोकारवालाहरुसँग भएको छलफलमा गृहमन्त्री लेखकले दिनमा ७ जनाको मृत्यु हुनु चिन्ताको विषय भएको बताए ।

यातायात व्यवसायीलाई दक्ष सवारी चालक राख्न आग्रह गर्दै उनले भने, ‘दुर्घटना एकदमै बढ्यो । सडक सुरक्षा परिषद, सडक विभाग, मन्त्रालय, प्रहरीका साथीलाई भन्न चाहन्छु, आगामी २–३ महिनामा दुर्घटना कम भएको देखिनुपर्छ ।’

घटस्थापना आउन ३५ दिन बाँकी रहेको भन्दै चाडपर्वमा विशेष व्यवस्था मिलाउन समेत निर्देशन दिए । ‘काउन्टर खोलेर टिकट वितरण गर्नुका साथै रात्रीबसमा दुई जना चालक राख्नुपर्छ । मापसे र लापसे जाँचमा कडाइ गर्ने काम थाल्नुपर्छ’, उनले भने ।

यसपालिको दसैंलाई दुर्घटनारहित बनाउनुपर्नेमा गृहमन्त्रीले जोड दिए । ‘सार्वजनिक यायातात सुव्यवस्थित बनाउनुहोस्, यो पालिको दसैंमा दुर्घटनारहित बनाऔं,’ उनले भने ।