२०८१ मंसिर २१ गते १३:५२ 
२१ मंसिर, काठमाडौं । शनिवार देखि काठमाडौंमा सुरु हुने काभा पुरुष भलिबल क्लब च्याम्पियनसिपको खेल तालिका सार्वजनिक भएको छ ।
तालिका अनुसार नेपाली क्लब हेल्प नेपाल स्पोर्ट्स क्लबले उद्घाटन खेलमा भारतको क्यालिकट हिरोजसँग प्रतिस्पर्धा गर्नेछ । खेल त्रिपुरेश्वरस्थित राखेपको कभर्डहलमा दिउँसो सवा ३ बजे सुरु हुनेछ ।
पहिलो दिनै नेपालको अर्को क्लब गण्डकी प्रदेशले माल्दिभ्सको एचडिसी क्लबसँग खेल्नेछ । यो खेल साँझ साढे ५ बजे सुरु हुनेछ ।
अन्य दिनको खेलहरु भने दिउँसो साढे २ र साँझ ५ बजे सुरु हुनेछ ।
सेन्ट्रल एसियन भलिबल एसोसिएसन (काभा) को कार्यक्रम अनुसार नेपाल भलिबल संघको आयोजनामा हुन लागेको काभा पुरुष भलिबल क्लब च्याम्पियनसिपमा नेपालका दुई सहित ५ क्लबको सहभागिता छ ।
नेपालबाट आठौं एनभीएल लिगको विजेता हेल्प नेपाल र उपविजेता गण्डकी प्रदेशले खेल्दैछन् । यस्तै भारतको क्यलिकट हिरोज, माल्दिभ्सको एचडिसी क्लब र इरानको चादौर क्लब छन् ।
सिंगल राउण्ड रोविनका आधारमा लिग चरणमा कूल १० खेल हुनेछन् । त्यसपछि शीर्ष चार टोलीले सेमिफाइन खेल्नेछ ।
लिग चरणमा पहिलो र तेस्रो हुनेबीच पहिलो सेमिफाइनल हुनेछ भने दोस्रो र चौथो हुनेबीच दोस्रो सेमिफाइनल हुनेछ ।
फाइनल खेल डिसेम्बर १४ अर्थात मंसिर २९ गते हुनेछ ।
प्रतिक्रिया 4