दुई फरक अवस्थाको टिम जनकपुर बोल्ट्स र लुम्बिनी लायन्स खेल्दै

२३ मंसिर, काठमाडौं । नेपाल प्रिमियर लिग (एनपीएल)मा आज दुई फरक स्थितीमा रहेको टिम जनकपुर बोल्ट्स र लुम्बिनी लायन्स पहिलो खेलमा भिड्दै छन् । खेल कीर्तिपुरस्थित टीयू अन्तर्राष्ट्रिय क्रिकेट मैदानमा बिहान ९ बजे सुरु हुनेछ ।

एकातर्फ जनकपुर एक जितले प्लेअफ नजिक पुग्नेछ भने अर्कोतर्फ एक हारले लुम्बिनी लायन्सको प्लेअफ पुग्ने सम्भावना लगभग अन्त्य हुनेछ ।

अनिल शाहको कप्तानीमा रहेको जनकपुरले सुरुवाती तीन खेलमा शतप्रतिशत जित निकालेको छ । ६ अंक जोडेर जनकपुर अंकतालिकामा दोस्रो स्थानमा छ । सुदूरपश्चिम रोएल्स समान अंक भएपनि जनकपुर नेटरनरेटमा पछि रहेको हो ।

जनकपुरले उद्घाटन खेलमै विराटनगर किंग्सलाई ८ विकेटले पराजित गरेको थियो । त्यसपछि कर्णाली याक्सलाई पनि सोही नतिजामा हराएको जनकपुरले पोखरा एभेन्जर्समाथि ७ विकेटको जित हासिल गरेको थियो ।

जनकपुर लगातार चौथो खेल जितेर प्लेअफको नजिक पुग्ने लक्ष्यमा छ ।

उता राष्ट्रिय टिमका कप्तान रोहित पौडेलको कप्तानीमा रहेको लुम्बिनी भने लगातार तीन खेल हारेर पूछारमा छ । एनपीएलमा सहभागि ८ मध्ये अहिलेसमसम् जितविहिन हुने एक्लो टोली लुम्बिनी नै हो । बाँकी ७ टोलीले कम्तीमा एक खेल जितेका छन् ।

लुम्बिनीका लागि जारी एनपीएलमा ३ खेल सकिँदासम्म कही राम्रो भएको छैन । एकातर्फ हारबाट प्रतियोगिताको सुरुवात । त्यसमाथि लगातार खेल्नुपर्ने बाध्यता  । अर्कोतर्फ लुम्बिनीको विदेशी खेलाडीले राम्रो प्रदर्शन गर्न सकेका छैनन् । यस्तै नेपाली खेलाडीबाट पनि सोचे अनुसारको प्रदर्शन देखिन सकेको छैन ।

कप्तान रोहित र विवेक यादवले एक-एक अर्धशतक बनाउनु बाहेक लुम्बिनीको अहिलेसम्म सम्झनलायक केही पनि छैन ।

लुम्बिनीलाई कम्तीमा प्लेअफ सम्भावना कायम राख्न र समर्थकहरुका लागि खुशी बनाउन भएपनि अब जनकपुरविरुद्ध जितको विकल्प छैन । प्रतियोगिता जति अघि बढ्दै गयो लुम्बिनीलाई अझ दबाब थपिँदै जानेछ ।

खेल : जनकपुर रोएल्स भर्सेस लुम्बिनी लायन्स

मिति र समय :  २३ मंसिर बिहान ९ बजे

स्थान : टीयू अन्तर्राष्ट्रिय क्रिकेट मैदान, कीर्तिपुर

जनकपुर बोल्ट्स सम्भावित ११ : आसिफ शेख, अनिल शाह, लाहिरु मिलान्था, हर्श थाकर, जिम्मी नीशम, आकाश त्रिपाठी, मोहम्मद मोहसिन, हेमन्त धामी, किशोर महतो, ललित राजवंशी, तुल बहादुर थापा

लुम्बिनी लायन्स सम्भावित ११ : उन्मुक्त चन्द, टम मुर्स, रोहित पौडेल, सन्दिप जोरा, विवेक यादव, साद विन जफर, दिनेश अधिकारी, रामोन सिमोण्ड्स, दुर्गेश गुप्ता, सूर्य तामाङ, तिलकराज भण्डारी