रेल चालकको आत्महत्याले फ्रान्समा रेल सेवा अवरुद्ध

१० पुस, पेरिस । एक रेल चालकले ड्युटीमा रहँदा गरेको आत्महत्याले रेल यातायातमा व्यापक ढिलाइ भएको फ्रान्सको रेल सञ्चालक एसएनसीएफले बुधबार जनाएको छ ।

मङ्गलबारदेखि बुधबारसम्म भएको पेरिस र दक्षिणपूर्वी फ्रान्सबीचको रेल सेवामा ढिलाइका कारण करिब तीन हजार यात्रु प्रभावित भएका छन् ।

यात्राका लागि असाधारण रूपमा व्यस्त समय क्रिसमसको पूर्वसन्ध्यामा आत्महत्या गरेपछि मङ्गलबार करिब १० वटा उच्च गतिको (टिजिभी) रेलहरू पाँच घन्टासम्म ढिलाइ भएका थिए ।

पेरिसको दक्षिणपूर्वमा रहेको मेलुनस्थित अभियोजकको कार्यालयले चालकले चलिरहेको रेलबाट उफ्रेर आत्महत्या गरेको देखिएको बताएको छ । उनको शव पछि रेलमार्ग नजिकै फेला परेको थियो ।

कार्यालयका अनुसार चालकविना नियन्त्रणमा रहेको रेलको स्वचालित आपत्कालीन प्रक्रिया सक्रिय भएकाले रेल रोकियो ।

मृत्युको परिस्थितिबारे अनुसन्धान जारी छ ।

एसएनसीएफले चालकको मृत्युको पुष्टि गर्दै उनले ‘रेल चल्दै गर्दा आत्महत्या गरेको’ बताएको छ । रेलमा यात्रुहरूको सुरक्षामा वा नेटवर्कमा अन्यत्र सेवाहरूमा कुनै खतरा नभएको एसएनसीएफले बताएको छ ।

बुधबार रेल यातायात ‘क्रमिक रूपमा पुनः सुरु’ भइरहेको थियो । यद्यपि एसएनसीएफले केही सम्भावित थप ढिलाइको चेतावनी दिएको छ । रासस/एएफपी