+
+

गोर्खाली सांसदको प्रस्ताव : नेपालको नामै गोरखा राखौं

अनलाइनखबर अनलाइनखबर
२०८१ पुष २५ गते १२:४२

२५ पुस, काठमाडौं । नेपाली कांग्रेसका सांसद राजेन्द्र बजगाईंले देशको नाम परिवर्तनको प्रस्ताव गरेका छन् ।

गोरखा नेपालको ऐतिहासिक एकता र वीरताको प्रतीक रहेको भन्दै उनले नेपालको नाम नै गोरखा राख्नुपर्ने बताएका छन् । ‘देशको नाम ‘गोरखा’ राख्नुपर्छ’ सांसद बजगाईंले सामाजिक सञ्जालमा लेखेका छन् । सांसद बजगाईं गोरखा निर्वाचन क्षेत्रनम्बर १ बाट निर्वाचित प्रतिनिधि सभा सदस्य हुन् ।

उनी अगाडि लेख्छन्, ‘‪गोरखा नेपालको ऐतिहासिक एकता र वीरताको प्रतीक हो । यो नामले देशको गौरवशाली इतिहासलाई प्रखर बनाउँछ ।’

नाम परिवर्तनले मात्र समस्याहरू समाधान नहुने उल्लेख गर्दै उनले जनताको पहिचान र भावनालाई सम्मान गर्दै निर्णय गर्नुपर्ने बताएका छन् । साथै, संघीय राजधानी पनि काठमाडौंबाट अन्यत्र सार्नुपर्ने उनको मत छ ।

उनी लेख्छन्, ‘‪काठमाडौं सांस्कृतिक अतिक्रमण र अत्यधिक जनघनत्वले पीडित छ । यसलाई संरक्षित सांस्कृतिक सहर बनाउन राजधानी अन्यत्र सार्नु उपयुक्त हुन्छ ।’

नयाँ संघीय राजधानीका सम्भावना तुलसीपुर, चितवन र पोखरामा रहेको पनि उनले बताएका छन् । काठमाडौंबाट संघीय राजधानी सारिए काठमाडौंलाई पर्यटक र सांस्कृतिक केन्द्रका रूपमा विकास गर्न सहयोग पुग्ने उनको मत छ .

‪रैथानेहरूको संरक्षण गर्नुपर्ने, ‪परम्परागत जीवनशैली विस्थापित हुन नहुने उल्लेख गर्दै उनी लेख्छन्, ‘ रैथाने समुदायको सांस्कृतिक अधिकार सुरक्षित गर्नुपर्छ । संरक्षित क्षेत्र घोषणा गरी समुदायलाई सहभागी गराई संरक्षण योजनाहरू बनाइनुपर्छ ।’

ब्रान्डिङ र पहिचान परिवर्तनले नयाँ अवसर सिर्जना गर्ने उनको विश्वास छ । नेपालका लागि सांस्कृतिक जरा बचाउँदै आधुनिक पहिचान स्थापित गर्न नयाँ दृष्टिकोण आवश्यक रहेको उनले बताएका छन् .

उनी अगाडि लेख्छन्, ‘‪काठमाडौंको संरक्षण, सांस्कृतिक पहिचानको प्रवर्द्धन, र दीर्घकालीन स्थायित्वका लागि यस्ता विचार र कदम महत्ववपूर्ण छन् । तर यसको कार्यान्वयन जनताको समर्थन र स्पष्ट रणनीतिबिना सम्भव छैन ।’

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?