२०८१ पुष २६ गते २०:५३ 
२६ पुस, काठमाडौं । नेपाल कबड्डी लिग (एनकेएल) को खेल तालिका शुक्रबार सार्वजनिक गरिएको छ । एस्ट्रोनिक्स म्यानेजमेन्टको आयोजनामा आगामी माघ ४ गतेदेखि सुरू हुने एनकेएलको उद्घाटन खेलमा काठमान्डु माभरिक्स र पोखरा लेकर्स भिड्ने भएका छन् ।
यसैगरी विराटनगरले पहिलो खेलमा धनगढी वाइल्डक्याट्सको सामना गर्नेछ । जनकपुर नाइट्सले बुटवलको हिमालयन रेइडर्सविरुद्ध प्रतिस्पर्धा गर्नेछ ।
एनकेएलमा राउन्ड रोबिन लिगमा १५ खेल हुनेछ, जसको शीर्ष चार टिम नकआउट चरणमा प्रवेश गर्नेछन् । लिगका शीर्ष दुई टिमले माघ १४ गते क्वालिफायर १ खेल्नेछ, जसको विजेता सिधै फाइनलमा पुग्नेछ ।
लिगमा तेस्रो र चौथो स्थानमा रहेका टिमले माघ १४ गते नै एलिमिनेटरमा खेल्नेछ, जसको विजेता क्वालिफायर २ मा पुग्नेछ । क्वालिफायर १ मा पराजित भएका टिम र एलिमिनेटरका विजेताबीच माघ १६ गते हुने क्वलिफायर २ मा जित हासिल गर्ने टिमले फाइनलमा स्थान पाउनेछ । फाइनल खेल माघ १८ गते हुनेछ ।
एनकेएलको पहिलो सिजनमा ६ सहरका ६ फ्रेन्चाईज टिमले प्रतिस्पर्धा गर्दैछन् । राष्ट्रिय खेलकुद परिषदको त्रिपुरेश्वरस्थित कभर्डहलमा माघ १८ गतेसम्म सञ्चालन हुने एनकेएलमा दैनिक एक वा दुई खेल सञ्चालन गरिनेछ ।
दुई खेल हुँदा दिनको पहिलो खेल साँझ ५ः३० बजे सुरू हुनेछ भने त्यसपछि दोस्रो खेल ६ः३० बजे सुरू हुनेछ । एक खेलमात्रै भएको दिन खेल साँझ ६ः३० बजे सुरू हुनेछ ।
प्रतिक्रिया 4