जनवरीमा भित्रिए ८० हजार पर्यटक, समग्र आगमन बढ्दा भारतीय घटे

२० माघ, काठमाडौं । सन् २०२५ को पहिलो महिना जनवरीमा करिब ८० हजार पर्यटक नेपाल भित्रिएका छन् ।

नेपाल पर्यटन बोर्डका अनुसार जनवरीमा ७९ हजार ९ सय ९१ पर्यटक नेपाल भ्रमणमा आएका हुन् । २०२४ जनवरीमा ७९ हजार १ सय पर्यटक भित्रिएका थिए ।

समग्र पर्यटक आगमन हेर्दा यस वर्ष पहिलो महिना आगमनमा सुधार भएको देखिन्छ । तर, भारतीय पर्यटक आगमनमा भने कमी आएको छ ।

यस वर्ष जनवरीमा भारतबाट २० हजार ४ सय ८५ पर्यटक आए । यो अघिल्लो वर्ष जनवरीको दाँजोमा १५ प्रतिशतले कम हो । अघिल्लो वर्ष जनवरीमा २४ हजार १ सय ३९ भारतीय नेपाल भ्रमणमा आएका थिए ।

पर्यटन बोर्डका निर्देशक मणिराज लामिछाने यस वर्ष धेरै भारतीय पर्यटक कुम्भ मेलामा सहभागी हुन जाँदा नेपालतर्फको आगमन समेत प्रभावित हुन पुगेको अनुमान गर्छन् ।

‘एक त नेपालमा ठुल्ठूला सडक दुर्घटना र त्यसमा भारतीय नागरिक पर्न थालेपछि उनीहरूको आगमन खस्किएको थियो,’ लामिछाने भन्छन्, ‘त्यसमाथि अहिले कुम्भ मेलाले आगमनमा केही प्रभाव पारेको छ ।’

भारतीयको संख्या घट्दा घट्दै समग्र आगमन सुधार हुनुले पदयात्रामा जाने तथा अन्य देशका नागरिकको आगमन बढाएको देखिने उनको भनाइ छ ।

भारतीय घट्दा बंगलादेशबाट भने आगमनमा उच्च सुधार देखिएको छ । जनवरीमा बंगलादेशबाट ५ हजार ४ सय ६ पर्यटक नेपाल आएका छन् । अघिल्लो वर्षको तुलनामा यो ४९ प्रतिशत धेरै हो ।

२०२४ जनवरीमा बंगलादेशबाट ३ हजार ६ सय २९ पर्यटक नेपाल आएका थिए । चीनबाट हुने आगमन समेत सुधार भएको छ ।

चीनबाट जनवरीमा ८ हजार १ सय ९१ पर्यटक आएका छन् । यो २०२४ जनवरीको तुलनामा १२.७ प्रतिशतको सुधार हो । गत वर्ष  ७ हजार २ सय ६७ चिनियाँ पर्यटक नेपाल आएको तथ्यांकले देखाउँछ ।

यद्यपि, चिनियाँको आगमन कोभिड–१९ अगाडिको तुलनामा भने अझै पुगेको छैन । २०१९ जनवरीमा समग्र पर्यटक आगमन ८१ हजार २ सय ७३ रहँदा चिनियाँ १२ हजार ९ सय १६ आएका थिए । त्यो वर्ष भारतीय भने १७ हजार ६ सय ९० मात्र आएका थिए ।

सार्क मुलुकको आगमन खस्कियो

दक्षिण एसियाली भेगको समग्र आगमन खस्किएको देखिन्छ । यसो हुनुमा भारतीयको संख्यामा कमी आउनु हो । बंगलादेशी पर्यटक आगमन बढे पनि श्रीलंकाली पर्यटक आगमन भने केही कम भएको छ । श्रीलंकाबाट ४ सय ७ पर्यटक नेपाल भ्रमणमा आएका छन् ।

पाकिस्तानी पर्यटक आगमन सुधार हुँदा भुटानबाट आउने पर्यटक समेत बढेका छन् । एसियाली देशमध्ये भियतनाम, इन्डोनेसिया सहितबाट पर्यटक बढ्दा थाइल्यान्ड, फिलिपिन्स, सिंगापुर, दक्षिण कोरिया लगायतबाट घटेका छन् । एसियाली भेगको आगमन समग्रमा घटेको छ ।

युरोपेली बढे

जनवरीमा युरोपबाट आउने पर्यटक संख्या सुधार भएको छ । युरोपेलीमध्ये सबैभन्दा धेरै बेलायतबाट ३ हजार ५ सय २१ पर्यटक आएका छन् । यो अघिल्लो वर्षको तुलनामा ७.५ प्रतिशत धेरै हो ।

२०२४ जनवरीमा ३ हजार २ सय ७६ पर्यटक बेलायतबाट आएका थिए । जर्मनीबाट १ हजार ३ सय २१, फ्रान्स १ हजार १०, रुस ६ सय १६ पर्यटक आएको देखिन्छ । यी सबै देशबाट आगमनमा सुधार भएको छ ।

अस्ट्रेलिया र अमेरिकाबाट आउने संख्यामा सुधार

यस वर्ष जनवरीमा अस्ट्रेलिया–न्युजिल्यान्डबाट आउने पर्यटक संख्यामा राम्रो सुधार देखिएको छ । अस्ट्रेलियाबाट ४ हजार ३ सय १ पर्यटक नेपाल आएका छन् । अघिल्लो वर्ष ३ हजार ४ सय २१ पर्यटक त्यहाँबाट आएका थिए ।

अमेरिकाबाट एक महिनामा ८ हजार ६३ जना नेपाल आएका छन् । अघिल्लो वर्ष ७ हजार ४७ आएका थिए । यस वर्ष मध्यपूर्व र अफ्रिकी देशबाट पर्यटक आगमन घटेको छ ।