‘विध्वंश मच्चाउन सक्छन् भनेर पहिल्यै भनेको थिएँ’

एकीकृत समाजवादीका अध्यक्ष माधव नेपाल जुन बेला भृकुटीमण्डपमा समाजवादी मोर्चाको गणतान्त्रिक सभालाई सम्बोधन गर्दै थिए, ठिक त्यसै बेला उनको पार्टी कार्यालय तथा भाइको निवासमा आक्रमण हुँदै थियो ।

राजा ज्ञानेन्द्रको उक्साहटमा राजावादीहरूले विध्वंश मच्चाएको उनको विश्लेषण छ । तीनकुने, कोटेश्वर क्षेत्रका सार्वजनिक तथा निजी सम्पत्तिमा तोडफोड हुँदा पनि रोक्न नसकेको भन्दै उनले सरकारको आलोचना पनि गरेका छन् ।

नेपालसँग अनलाइनखबरको कुराकानी :

तीनकुने क्षेत्रका घर, पसलसँगै तपाईंको पार्टी कार्यालयमा पनि राजावादी प्रदर्शनकारीले क्षति पुर्‍याए, के भन्नुहुन्छ ?

अत्यन्तै निन्दनीय, आपराधिक, अराजनीतिक गुन्डागर्दी हो यो । विचार आ–आफ्ना हुन सक्छन्, तर कुनैपनि शान्तिपूर्ण आन्दोलन यस्तो हुन सक्दैन । प्रदर्शन गर्छौं भन्नेहरूले सबै सीमा नाघेका छन् । यस्तो आपराधिक क्रियाकलाप गर्नेलाई तुरुन्तै गिरफ्तार गरी छानबिन तथा आवश्यक कारबाही गर्नुपर्छ ।

आजको घटनाको जिम्मा कसले लिनुपर्छ ?

छानबिनमा दोषी देखिएका जो जो छन्, तिनले नै यसको जिम्मा लिनुपर्छ । उनीहरूमाथि कडा कानुनी कारबाही हुनुपर्छ । हिंसा र अराजकतालाई प्रोत्साहन गर्नेहरू समेत कारबाहीको भागीदार हुनुपर्छ ।

पूर्वराजा ज्ञानेन्द्रको निर्देशन तथा उक्साहटमा आजको घटना भएको हो ? तपाईंको भनाई के छ ?

उनको उक्साहट छ भने उनी पनि कारबाहीको भागीदार बन्नुपर्छ । आज जे भयो, यो पूरै निन्दनीय हर्कत हो ।

राजावादी केही नेताहरूले विगतमा तपाईंहरूले गर्ने शान्तिपूर्ण भनिएका आन्दोलनमा पनि यस्तो गतिविधि हुन्थ्यो भन्दै प्रतिप्रश्न गरिरहनुभएको छ नि ?

बेइमान कुरा हो त्यो । त्यो बेला पनि उग्रताहरू देखियो होला, तर के त्यस बेला सर्वसाधारणको घरमा घुसेर सम्पत्ति तोडफोड भयो ? पसलहरुमा आगो लगाइयो ? आततायी ढंगले आक्रमणहरू गरेर पनि कहिँ शान्तिपूर्ण आन्दोलन हुन्छ ? हाम्रो पार्टी कार्यालयमा, मेरो भाइको घरमा पनि आक्रमण भएको छ । के यो शान्तिपूर्ण आन्दोलन हो ? उनीहरूले जवाफ दिनुपर्छ ।

सरकारको आवश्यक पूर्वतयारी र सुरक्षा प्रणालीबारे केही टिप्पणी छ ?

खासमा मैले पहिल्यै भनेको थिएँ, कि यिनीहरुले विध्वंश मच्चाउन सक्छन् । तर पर्याप्त सुरक्षा तयारी नअपनाउँदा यो कमजोरी हुन पुग्यो । विरोधी तत्वहरूले अराजक शैलीमा घुसपैठ गराएका थिए । र यसमा विभिन्न पक्षहरू मिसिएका हुन सक्छन् । त्यसबारे पहिल्यै ख्याल हुनुपथ्र्यो । शान्तिपूर्ण भने पनि उनीहरुको तयारी शान्तिपूर्ण प्रदर्शन गर्ने थियो भन्ने मलाइ लाग्दैन ।

तपाईंहरू अब के गर्नुहुन्छ ?

आज एकैछिनमा हाम्रो वक्तव्य आउँछ । त्यसमा हामीले परिस्थितिबारे आफ्नो धारणा राख्छौं । भोलि बिहान बैठक बसेर आगामी योजनाहरू बाहिर ल्याउँछौं ।