२०८२ वैशाख १६ गते २३:५० 
१६ वैशाख, काठमाडौं । सुनिल नरायनले ब्याटिङ, बलिङ र फिल्डिङ तीनवटै क्षेत्रमा शानदार प्रदर्शन गरेपछि कोलकाता नाइट राइडर्सले इन्डियन प्रिमियर लिग आईपीएल क्रिकेटमा चौथो जित निकालेको छ ।
कोलकाताले दिल्लीलाई १४ रनले हराएको हो । कोलकाताले दिएको २०५ रनको लक्ष्य पछ्याएको दिल्लीले २० ओभरमा ९ विकेट गुमाएर १९० रन बनायो ।
फाफ डुप्लेसीले सर्वाधिक ६२ तथा कप्तान अक्षर पटेलले ४३ रन बनाएपनि पर्याप्त हुन सकेन । ६० रनमा ३ विकेट गुमेपछि फाफ र अक्षरले ७६ रनको साझेदारी गरे ।
१४औं ओभरको दोस्रो बलमा अक्षर र अन्तिम बलमा ट्रिस्टन स्टब्स तथा १६औं ओभरमा फाफलाई नरायनले आउट गरेपछि कोलकाता खेलमा फर्किएको थियो ।
सुनिल नरायनले ४ ओभरमा २९ रन दिएर ३ विकेट लिए । उनले एक डाइरेक्ट हिटमार्फत केएल राहुललाई पनि आउट गराए भने एक क्याच पनि लिए ।
अन्त्यतिर विपराज निगमले १९ बलमा ३८ रन बनाउँदै झिनो आशा जगाएका थिए । कोलकाताका वरुण चक्रवर्तीले २ तथा अनुकुल रोय, आन्द्रे रसेल र वैभव अरोराले १-१ विकेट लिए ।
त्यसअघि टस हारेर पहिले ब्याटिङ गरेको कोलकाताले २० ओभरमा ९ विकेट गुमाएर २०४ रन बनाएको थियो । अंगकृश रघुवंशीले सर्वाधिक ४४ तथा रिंकु सिंहले ३६ रन बनाए । सुनिल नरायनले २७ तथा रहमनुल्लाह गुरबाज र अजिन्क्या रहानेले समान २६ रन बनाए ।
दिल्लीका लागि मिचेल स्टार्कले ३ विकेट लिँदा विपराज निगम र अक्षर पटेलले २-२ तथा दुस्मान्था चमीराले १ विकेट लिए ।
यस जितपछि सातौं स्थानको कोलकाताको १० खेलमा ९ अंक भएको छ भने चौथो स्थानको दिल्लीको १० खेलमा १२ अंक छ ।
सुरुवाती ४ खेलमा लगातार जित निकालेको दिल्लीले त्यसयता ६ खेलमा २ खेल मात्र जितेको छ ।
प्रतिक्रिया 4