प्रधानमन्त्रीद्वारा चलचित्र विकास कम्पनीको अतिक्रमित २७ रोपनी जग्गा फिर्ता ल्याउन निर्देशन

News Summary

Generated by OK AI. Editorially reviewed.

प्रधानमन्त्री केपी शर्मा ओलीले बालाजुस्थित चलचित्र विकास कम्पनीको अतिक्रमित २७ रोपनी जग्गा सरकारको नियन्त्रणमा ल्याउने निर्देशन दिएका छन्।
उनले हप्ता १० दिनभित्र कानूनी प्रक्रिया पुरा गरी उक्त जग्गा सरकारको नियन्त्रणमा ल्याउने जिम्मा दिएका छन्।
अहिले उक्त जग्गाको क्षेत्रफल ७ रोपनीमा खुम्चिएको छ र त्यसको बाँकी भाग विभिन्न व्यवसायिक कम्पनीलाई भाडामा दिइएको छ।

काठमाडौं । प्रधानमन्त्री केपी शर्मा ओलीले बालाजुस्थित तत्कालिन चलचित्र विकास कम्पनीको अतिक्रमित २७ रोपनी जग्गा सरकारको मातहतमा ल्याउन निर्देशन दिएका छन् ।

‘सिनेपाः’ छायांकन स्टुडियोको निर्माण सुरु भएको घोषणा गर्न आयोजित समारोहमा उनले संचार तथा सूचना प्रविधिमन्त्री पृथ्वीसुब्बा गुरुङ र संचार सचिव राधिका अर्याललाई उक्त जग्गा सरकारको नियन्त्रणमा ल्याउन निर्देशन दिए ।

प्रधानमन्त्रीले हप्ता १० दिनभित्र यसबारे पत्ता लगाएर, कानूनी प्रक्रिया पुरा गरेर सरकारको नियन्त्रणमा ल्याउन निर्देशन दिए ।

सुरुमा २७ रोपनी रहेको उक्त जग्गा अहिले अतिक्रमणको चपेटामा परेर ७ रोपनीमा खुम्चिएको छ । तत्कालिन चलचित्र विकास कम्पनीले बालाजु औद्योगिक क्षेत्र व्यवस्थापन समितिबाट जग्गा लिजमा लिएको थियो । त्यसपछि अतिक्रमणको मारमा परेको जग्गाको क्षेत्रफल खुम्चिँदो छ ।

अहिले रहेको ७ रोपनी जग्गा मध्ये पनि बाँकी ४ रोपनी विभिन्न व्यवसायिक कम्पनीलाई भाडामा दिइएको छ । तत्कालिन संचार तथा सूचना प्रविधिमन्त्री गोकुल बासकोटाले जग्गा फिर्ता ल्याउन प्रयास थालेका थिए । तर, मन्त्रीबाट हटेपछि यो काम अलपत्र थियो ।

मंगलबार बालुवाटारमा आयोजित समारोहमा पूर्वमन्त्री बासकोटाले नै यो जग्गाको विषयमा प्रधानमन्त्रीको ध्यानाकर्षण गराएका थिए । त्यसपछि प्रधानमन्त्री ओलीले निर्देशन दिएका हुन् ।