तुल्सीपुरमा साढे २३ करोड लागतको खानेपानी आयोजनामा ऋण सम्झौता

News Summary

Generated by OK AI. Editorially reviewed.

नगर विकास कोषले दाङ तुल्सीपुरको अमृतपुर खानेपानी आयोजना निर्माणका लागि ऋण सम्झौता गरेको छ।
यस योजनाले २२ हजारभन्दा बढी जनसंख्यालाई २४ घण्टा खानेपानी सेवा प्रदान गर्ने लक्ष्य राखिएको छ।
आयोजनाको कुल लागतको ७० प्रतिशत नेपाल सरकारबाट अनुदान, २५ प्रतिशत कोषबाट ऋण र ५ प्रतिशत उपभोक्ता संस्थाबाट आउनेछ।

३० वैशाख, काठमाडौं । नगर विकास कोषले सहलगानी तथा साझेदारी नीति अनुसार दाङ तुल्सीपुरको अमृतपुर सहलगानी खानेपानी आयोजना निर्माण गर्न ऋण सम्झौता गरेको छ ।

खानेपानी तथा ढल व्यवस्थापन विभागले आयोजनाका लागि दिएको ठेक्काको लागत २३ करोड ६५ लाख ३९ हजारको २५ प्रतिशतले हुने रकम ५ करोड ९१ लाख ३४ हजार ७ सय ५० रुपैयाँ कोषबाट ऋण लगानीका लागि सम्झौता भएको हो ।

नगर विकास कोषका कार्यकारी निर्देशक विनोदप्रकाश पण्डित र अमृतपुर खानेपानी उपभोक्ता तथा सरसफाइ संस्थाका अध्यक्ष चन्द्रकान्त शर्माले सम्झौतामा हस्ताक्षर गरेका छन् ।

सम्झौतामा तुल्सीपुर उपमहानगरपालिका नगर कार्यपालिका प्रमुख टिकाराम खड्काले जमानतकर्ताका रूपमा हस्ताक्षर गरेका छन् ।

२२ हजार बढी जनसंख्यालाई खानेपानी सेवा

तुल्सीपुर उपमहानगरपालिकाका वडा नम्बर ३, ८ र ९ सेवा क्षेत्र रहेको उक्त आयोजनाका लागि कूल लागतको नेपाल सरकारबाट ७० प्रतिशत अनुदान, नगर विकास कोषबाट २५ प्रतिशत ऋण लगानी र ५ प्रतिशत रकम उपभोक्ता संस्थाबाट बेहोरिने छ ।

आयोजना निर्माणपछि ४ हजार ९ सय १४ घरधुरीका २२ हजार ५ सय ९६ जनसंख्यालाई चौबिसै घण्टा खानेपानी सेवा पुर्‍याउने लक्ष्य छ ।