मार्को यानसेन पञ्जाब किङ्सको टोलीमा पुन: आबद्ध हुने

३१ वैशाख, काठमाडौं । दक्षिण अफ्रिकाका पेस बलिङ अलराउण्डर मार्को यानसेन आईपीएल २०२५ फेरि सुरु हुँदा पञ्जाब किङ्सको टोलीमा पुन: आबद्ध हुने भएका छन्।

उनले यस हप्ता जयपुरमा सुरु हुने टोलीको प्रशिक्षणमा सहभागी हुने र मे १८ मा राजस्थान रोयल्ससँगको खेल अघि टोलीमा जोडिने पञ्जाब किंग्स व्यवस्थापनलाई बताएको समाचार संस्था क्रिकइन्फोले जनाएको छ।

यानसेन विश्व टेस्ट च्याम्पियनसिपको फाइनल खेल्ने टोलीमा रहेका पहिलो दक्षिण अफ्रिकी खेलाडी हुन् जसले आईपीएलमा पुनः फर्कने पुष्टि गरेका हुन्।

जुन ११ मा लर्ड्समा सुरु हुने डब्लुटिसी फाइनलमा दक्षिण अफ्रिका अष्ट्रेलियासँग भिड्नेछ। तर, डब्लुटिसी फाइनलमा समावेश दक्षिण अफ्रिकी खेलाडीहरू मे २५ सम्म मात्र आईपीएलमा खेल्न पाउनेबारे क्रिकेट दक्षिण अफ्रिका र बीसीसीआईबीच छलफल जारी छ।

दक्षिण अफ्रिकी क्रिकेट बोर्डले आफ्ना खेलाडीहरूलाई मे २६ मा फिर्ता बोलाउने योजना बनाएको छ ताकि उनीहरू मे ३० मा बेलायत जान सकून्।

पञ्जाब किंग्सले यानसेनसँग कति समयसम्म उनी उपलब्ध हुने भन्नेबारे अझै छलफल गरिरहेको बुझिएको छ। बलिङ अलराउन्डर यानसेनले पञ्जाब किंग्सलाई आईपीएल २०२५ को प्लेअफको बलियो दावेदार बनाउन महत्त्वपूर्ण भूमिका खेलेका छन्।

श्रेयस अय्यरको कप्तानीमा पञ्जाब किंग्स ११ खेलपछि १५ अंकसहित तेस्रो स्थानमा छ। बाँकी तीन खेलमध्ये दुई खेल जितेमा उनीहरू प्लेअफमा स्थान सुरक्षित गर्न सक्छन्। तर, टोली अस्ट्रेलियन जोस इंग्लिस र मार्कस स्टोइनिस जस्ता विदेशी खेलाडीहरूको उपलब्धताका लागि भने अझै प्रतीक्षामा छ।

इंग्लिस र स्टोइनिस अस्ट्रेलियाका आरोन हार्डी र जेभियर बार्टलेटसँगै आईपीएल स्थगित भएपछि स्वदेश फर्किएका थिए। तर हालै बार्टलेट, मिचेल ओवेन (जसले ग्लेन म्याक्सवेलको स्थानमा टोलीमा स्थान पाएका थिए) र अफगानिस्तानका अजमतुल्लाह ओमरजई पुनः आईपीएलमा फर्किने पक्का भएको छ।

पञ्जाब किंग्सले आईपीएल पुनः सुरु भएपछि पहिलो खेल मे १८ मा राजस्थान रोयल्सविरुद्ध जयपुरमा खेल्नेछ।