२०८२ जेठ ३ गते १७:४२ 
२ जेठ, काठमाडौँ । स्व डम्बर धामी स्मृति टी-१० क्रिकेट प्रतियोगिता आइतबारदेखि सुरु हुने भएको छ । अनेरास्ववियू पूर्वाञ्चल विश्वविद्यालय राष्ट्रिय कमिटीको आयोजनामा हुने प्रतियोगितामा नेपालका तीन विश्वविद्यालयका १२ कलेजका टिमको सहभागीता रहने शनिबार पत्रकार सम्मेलनमार्फत जानकारी दिइएको छ ।
स्व. डम्बर धामीको स्मृतिमा हुन लागेको प्रतियोगिताको खेलहरु कीर्तिपुरस्थित त्रिवी क्रिकेट मैदानमा सञ्चालन हुनेछ ।
डढेलधुराका धामीको गत वर्ष मंसिरमा जिप दुर्घटनामा घाइते भइ उपचारको क्रममा मृत्यु भएको थियो । उनी हिस्ट इन्जिनियर कलेजबाट आफ्नो इन्जिनियरको पढाइ सकाएको केही समयपछि दुर्घटना भएको थियो ।
जेठ ८ गतेसम्म हुने यस प्रतियोगितामा १२ टिमलाइ ४ समूहमा विभाजन गरी लिग चरण अन्तर्गत १ दिनमा ३ देखि ४ खेल खेलाइनेछ ।
प्रतियोगिताको समूह एमा हिस्ट इन्जिनियरिङ कलेज, कान्तिपुर इन्टरनेसनल कलेज र एक्मे इन्जिनियरिङ कलेज छन् । समूह बीमा हिमालयन व्हाइट हाउस इन्टरनेसनल कलेज, जियोम्याटिक इन्स्टिच्युट अफ टेक्नोलोजी र कोसमस कलेज अफ म्यानेजमेन्ट एण्ड टेक्नोलोजी छन् ।
यस्तै, समूह सीमा कान्तिपुर सिटी कलेज, कलेज अफ आइटी एन्ड इन्जिनियरिङ र हिलसाइड कलेज अफ इन्जिनियरिङ छन् । यसैगरी समूह डीमा कान्तिपुर इन्जिनियरिङ कलेज, पशुपति मल्टिपल क्याम्पस र रत्नराज्य लक्ष्मी क्याम्पस छन् ।
प्रतियोगिताको विजेताले ३५ हजार र उपविजेताले २० हजार रुपैयाँ पुरस्कार पाउनेछन् । प्रतियोगिताको इन्ट्री फी १५ हजार रुपैयाँ रहेको आयोजकले जनाएको छ ।
प्रतिक्रिया 4