मेक्सिकन नौसेनाको जहाज दुर्घटनामा २ जनाको मृत्यु, १९ जना घाइते

News Summary

Generated by OK AI. Editorially reviewed.

मेक्सिकन नौसेनाको जहाज ब्रुकलिन पुलमा ठोक्किएर दुर्घटना हुँदा २ जनाको मृत्यु र १९ जना घाइते भएका छन्।
दुर्घटनाको कारण इन्जिन समस्या र विद्युत अवरोध भएको बताइएको छ र जहाजको मुस्तल पुलभन्दा बढी उचाइमा थियो।
घटना पछि ब्रुकलिन पुल पुनः सञ्चालनमा ल्याइएको छ र मेक्सिकन राष्ट्रपति दुःख व्यक्त गरेकी छन्।

४ जेठ, काठमाडौं । मेक्सिकन नौसेनाको एक जहाज न्युयोर्क शहरस्थित ब्रुकलिन पुलमा ठोक्किंदा भएको दुर्घटनामा २ जनाको मृत्यु भएको छ । अन्य १९ जना घाइते भएको बीबीसीले जनाएको छ ।

जहाज एक विशेष समारोहका लागि जाँदै थियो । शनिबार साँझ उक्त जहाज पुलमुनिबाट जाँदै गर्दा मुस्तल (जहाजको माथि राखिने विशाल खम्बा) ठोक्किएर दुर्घटना भएको हो ।

मुस्तलका टुक्रा जहाजमाथि नै खसेका थिए । त्यस क्रममा मानवीय क्षति भएको हो । जहाजमा २७७ जना सवार थिए । अन्य सेना भने सकुशल रहेका छन् ।

न्युयोर्क प्रहरीका अनुसार इन्जिनमा आएको समस्या र विद्युत अवरोधका कारण जहाज अनियन्त्रित भएको थियो । जहाजका तीनवटा मुस्तल भाँचिएका छन् । र, ती मुस्तलबाट नौसैनिकहरू खसेको भिडियोहरूमा देखिएको छ ।

न्युयोर्कका मेयर एरिक एडम्सले पनि दुर्घटनामा मानवीय क्षति भएको पुष्टि गरेका छन् । उनले एक्समा उल्लेख गरे अनुसार २ जनाको मृत्यु र १९ जना घाइते हुनुबाहेक अन्य कुनै पनि व्यक्ति हराएका छैनन् ।

घटनापछि केही समयका लागि बन्द गरिएको ब्रुकलिन पुल प्रारम्भिक परीक्षण गरी पुन: सञ्चालनमा ल्याइएको छ ।

मेक्सिकोकी राष्ट्रपति क्लाउडिया शेनबाउमले दुई जना चालक दलका सदस्यको मृत्युले आफू दुःखी भएको बताएकी छन् ।

दुर्घटनापछि जहाजलाई उक्त स्थानबाट हटाइएको छ। मेक्सिकन नौसेनाका अनुसार सन् १९८२ मा निर्माण भएको यो जहाज ९१ मिटर लामो र १२ मिटर चौडाइको छ । नौसैनिक प्रशिक्षण पूरा गर्न प्रत्येक वर्ष यो जहाज क्याडेटहरू लिएर यात्रामा निस्कन्छ ।

प्रहरीका अनुसार जहाजको मुस्तलको उचाइ ४८.२ मिटर थियो, जबकि ब्रुकलिन पुलको बीच भागको उचाइ ४१.१ मिटर (१३५ फिट) मात्रै छ ।