जनमतका निलम्बित कोषाध्यक्ष यादव धरौटी बुझाएर छुटे

News Summary

Generated by OK AI. Editorially reviewed.

ललितपुर जिल्ला अदालतले जनमत पार्टीका निलम्बित कोषाध्यक्ष सुरेन्द्रनारायण यादवलाई पाँच लाख धरौटीमा छाड्न आदेश दिएको थियो।
उनीलाई ७ वैशाखमा सप्तरीबाट पक्राउ गरी अदालतले रिहा गरेको एसएसपी श्यामकृष्ण अधिकारीले बताए।
उनलाई ठगीको आरोपमा १ करोड ८५ लाख रुपैयाँ बिगो असुल गर्न मुद्दा दायर भएको थियो।
यो विवाद ललितपुरको इमाडोलको घरबाट सुरु भएको देखिन्छ, जहाँ घरको विवादका कारण यादव पक्राउ परेका थिए।
जनमत पार्टीले रकमको जिम्मा यादवलाई दिएको थियो, तर उनले त्यो रकम चुनावका बेला लगेको र तिरेको दाबी गरे।

४ जेठ, काठमाडौं । जनमत पार्टीका निलम्बित कोषाध्यक्ष सुरेन्द्रनारायण यादवलाई धरौटी बुझाएर छुटेका छन् ।

ललितपुर जिल्ला अदालतका न्यायाधीश टेकराज जोशीको इजलासले यादवलाई पाँच लाख धरौटीमा छाड्न आदेश दिएको थियो । लगत्तै उनी धरौटीब बुझाएर रिहा भएको जिल्ला प्रहरी परिसर ललितपुरका एसएसपी श्यामकृष्ण अधिकारीले बताए ।

ठगीको कसुरमा ७ वैशाखमा सप्तरीबाट प्रहरीले उनलाई पक्राउ गरेको थियो । जनमत पार्टीका प्रवक्ता डा शरदसिंह यादवले दिएको जाहेरीका आधारमा उनी र उनकी श्रीमती ललिताकुमारी यादवविरुद्ध १ करोड ८५ लाख १ हजार रुपैयाँ बिगो असुल उपर गर्नुपर्ने माग गर्दै मुद्दा दायर भएको थियो ।

जनमतका नेताहरूको यो विवाद भने ललितपुरको इमाडोलको एक घरबाट सुरु भएको देखिन्छ । शिवा आलेको नाममा रहेको महालक्ष्मी नगरपालिका–४ इमाडोलमा रहेको कित्ता नम्बर ९४३ को १४३.१२ वर्गमिटरमा (साढे चार आना) तीन तले आठ कोठे घरको विवादका कारण उनी पक्राउ परेका थिए ।

यो खरिदका लागि भने जनमत पार्टीको सचिवालयले नै निर्णय गरेर कोषाध्यक्ष समेत रहेका यादवलाई जिम्मा दिएको बताएको थियो । त्यस वापत रकम कोषाध्यक्ष यादवलाई दिएको बताएका थिए । तर यादवले भने उक्त चुनावका बेला लगेको र अहिले तिरेको दाबी गरेका थिए ।