२०८२ जेठ ५ गते ९:४६ 
News Summary
Generated by OK AI. Editorially reviewed.- ला लिगा च्याम्पियन बार्सिलोना घरेलु मैदानमा भियारियालसँग ३-२ ले पराजित भयो ।
- भियारियालको जितमा पेरेज, कोमेसाना र बुचाननको गोल गरे । बार्सिलोनाका लागि लामिन यामल र फर्मिन लोपेजले गोल गरे ।
- ३७ खेलमा ६७ अंक जोडेर पाँचौं स्थानमा उक्लेको भियारियालले अर्को सिजनको च्याम्पियन्स लिगमा स्थान पक्का गर्यो।
५ जेठ, काठमाडौं । ला लिगा च्याम्पियन बनिसेको बार्सिलोना आइतबार भएको खेलमा घरेलु मैदानमा भियारियालसँग ३-२ ले पराजित भएको छ ।
ओलिम्पिक लुइस कम्पनिज रंशालामा भएको खेलमा भियारियाललाई जित दिलाउन आयोजे पेरेज, सान्टी कोमेसाना र ताजोन बुचाननले गोल गरे । बार्सिलोनाका लागि लामिन यामल र फर्मिन लोपेजले गोल गरे ।
जितपछि भियारियाल ३७ खेलमा ६७ अंक जोडेर अंक तालिकामा पाँचौं स्थानमा उक्लेको छ र अर्को सिजनको च्याम्पियन्स लिगमा समेत स्थान पक्का गरेको छ ।
च्याम्पियन बार्सिलोनाको समान खेलबाट ८५ अंक छ ।
खेलको चौथो मिनेटमै पेरेजको गोल गर्दै भियारियाललाई अग्रता दिलाएका थिए । तर पहिलो हाफमै बार्सिलोनाले दुई गोल गर्दै खेलमा फर्किएको थियो ।
बार्सिलोनाका लागि यामलले ३८औं मिनेटमा बराबरी गोल गरे भने पहिलो हाफको इन्जुरी टाइममा फर्मिन लोपेजले गोल गर्दै बार्सिलोनालाई २-१ को अग्रता दिलाए ।
तर बार्सिलोनाको अग्रता पनि लामो समय टिकेन । दोस्रो हाफको पाँचौ मिनेटमै कोमेसानाले गोल गर्दै भियारियाललाई खेलमा फर्काए ।
वैक्लपिक खेलाडीको रुपमा मैदान प्रवेश गरेका ताजोन बुचानानले ८०औं मिनेटमा गोल गर्दै भियारियाललाई ३-२ को जित दिलाए ।
अघिल्लो खेलमै च्याम्पियन बनिसकेको बार्सिलोनाको लागि घरेलु मैदानमा जितसहित ट्रफी उचाल्ने योजना बनाएपनि हारपछि खल्लो रह्यो ।
आइतबारै सम्पन्न खेलमा रियल मड्रिडले सेभियालाई २-० ले तथा एट्लेटिको मड्रिडले रियल बेटिसलाई ४-१ ले हरायो ।
यस्तै एथ्लेटिक विल्वाओले भ्यालेन्सियालाई १-० ले हरायो ।
च्याम्पियन बार्सिलोनासँगै रियल मड्रिड, एट्लेटिको मड्रिड, एथ्लेटिक विल्वाओ र भियारियालले अर्को सिजन च्याम्पियन्स लिगमा स्थान पक्का गरेका छन् ।
प्रतिक्रिया 4