राजावादीले गर्ने आन्दोलन दल होइन, जनताविरुद्ध हो : शंकर पोखरेल

नेकपा एमालेका महासचिव शंकर पोखरेल ।

News Summary

Generated by OK AI. Editorially reviewed.

नेकपा एमालेका महासचिव शंकर पोखरेलले १५ जेठदेखि हुने आन्दोलन जनताका विरुद्ध भएको टिप्पणी गरे।
उहाँले राजावादीले गरेको आन्दोलन कुनै दल वा व्यवस्थाका विरुद्ध नभई जनताका विरुद्ध भएको बताए।
पोखरेलले राजसंस्था कहिल्यै जनताको पक्षमा नभएको र विदेश जाने युवाहरूको संख्या बढ्दो रहेको बताए।

६ जेठ, काठमाडौं । नेकपा एमालेका महासचिव शंकर पोखरेलले राजावादीले १५ जेठदेखि गर्ने भनिएको आन्दोलन जनताका विरूद्धमा भएको टिप्पणी गरेका छन् ।

४१औं नेत्रलाल पौडेल अभागी स्मृति दिवसलाई मंगलबार सम्बोधन गर्न गृह जिल्ला दाङ आएका पोखरेलले राजावादीले गर्ने आन्दोलन कुनै दलका विरूद्ध नभई जनताका विरूद्व भएको बताए ।

‘गणतन्त्रले के दियो भन्दै भ्रम फैलाएर १५ जेठदेखि राजावादीले आन्दोलन गर्ने घोषणा गरेका छन्,’ महासचिव पोखरेलले भने, ‘त्यो आन्दोलन कुनै राजनीतिक दलका र व्यवस्थाका विरूद्व होइन, नेपाली जनताका विरूद्ध हो । हामीले यो कुरा जनतालाई बुझाउन सक्ने कि नसक्ने ?’

राजसंस्था कहिल्यै जनताको पक्षमा नभएको दाबी गर्दै पोखरेलले गलत कुराका पक्षमा नलाग्न आग्रह गरे । राजावादीले जनतालाई निरंकुशताको जाँतोमुनि पिसेर समाजमा लामो समय शोषणको राज चलाएको भन्दै महासचिव पोखरेलले उनीहरूले गणतन्त्र र जनताको सार्वभौम सत्ता विरूद्व प्रहार गरिरहेको बताए ।

स्मृति सभालाई सम्बोधन गर्दै महासचिव पोखरेलले युवाहरू विदेश गएर देश नबन्ने समेत टिप्पणी गरे । विदेशमा पसिना बगाएर आफ्नो देश नबन्ने भन्दै देश बनाउन आफ्नै देशमा पसिना बगाउनुपर्ने बताए ।

विदेश जानु केहीको बाध्यता भए पनि धेरै रहरले विदेश जाने गरेको उनको दावी छ । ‘रहरले विदेश जाने पनि छन्,’ उनले भने, ‘देश छोडेर देश निर्माणका कुरा गर्नेको संख्या दिनदिनै बढ्दो छ ।’