‘जन्ते बाख्रो’को शीर्ष गीतमा रोमान्टिक गरिमा, सौगात, आसिफ

News Summary

Generated by OK AI. Editorially reviewed.

फिल्म ‘जन्ते बाख्रो’को तेस्रो गीत ‘मुकु मुकु म्या’ युट्युबमा सार्वजनिक भयो।
गीतमा मुख्य पात्रहरू सौगात मल्ल, गरिमा शर्मा, आशिफ शाह लगायत फिचर्ड छन्।
फिल्मको कथा विवाह समारोहमा बेहुली पक्षले जन्तीलाई ‘जन्ते बाख्रो’ खुवाउने परम्परामा आधारित छ।

काठमाडौँ । जेठ २३ देखि प्रदर्शन तयारीमा रहेको फिल्म ‘जन्ते बाख्रो’को तेस्रो गीत सार्वजनिक भएको छ । युट्युबमा सार्वजनिक गीतको बोल छ- ‘मुकु मुकु म्या’ ।

यो फिल्मको शीर्ष गीत हो । ग्रामिण परम्परा र सांस्कृतिक चलनलाई चित्रण गरिएको गीतमा फिल्मका मुख्य पात्र सौगात मल्ल, गरिमा शर्मा, आशिफ शाह, लोकेन्द्र लेखक, विशाल पहाडी लगायत फिचर्ड छन् ।

गीतमा कृष्ण भारद्वाज र निर्भिकल्पमको शब्द, कृष्ण भारद्वाजको स्वर र रिकेश गुरुङको सङ्गीत छ । प्रदीप लामाको नृत्य निर्देशनमा तयार भएको गीतलाई लोकेश बज्राचार्यले सम्पादन गरेका हुन् ।

विवाह समारोहमा बेहुली पक्षले जन्तीलाई बारी वा खुला ठाउँमा खुवाउने चलन अर्थात् ‘जन्ते बाख्रो’ खुवाउने परम्परामाथि फिल्मको कथा आधारित रहेको निर्देशक सिमोस सुनुवारले बताए ।

फिल्ममा रमेश शाह, कमल देवकोटा, रुषा न्यौपाने, रमा थपलिया, कुसुम शर्मा, स्नेहा जोशी, समापिका गौतम, कुशल गजमेरको अभिनय छ । यसअघि फिल्मका दुई गीत ‘घामै राजा’ र ‘अङ्गुरको झुप्पो’ सार्वजनिक छन् ।

मुईन इन्टरटेनमेन्टको प्रस्तुतीमा तयार भएको फिल्म कमेडी जनरामा आधारित छ । सन्तोष गौतमको लगानी रहेको फिल्मलाई प्रदीप भारद्वाजले लेखेका हुन् । हरि हुमागाईंको छायांकन निर्देशन, उत्तम हुमागाईंको छायांकन, सुनिल शिवभक्तिको सम्पादन छ ।