१० महिनामा १० हजार ईभी आयात

चोभारस्थित सुक्खा बन्दरगाहमा भन्सारबाट प्रवेश गरेर आएका सवारीसाधन ।

News Summary

Generated by OK AI. Editorially reviewed.

नेपालले चालु आर्थिक वर्षको १० महिनामा लगभग १० हजार इलेक्ट्रिक सवारी आयात गरेको छ।
आयातको मूल्य २३ अर्ब १० करोड रुपैयाँभन्दा बढी रहेको छ।
चीनबाट ७ हजार ३ सय ५३ र भारतबाट २ हजार ४ सय ११ ईभी आयात भएका छन्।

७ जेठ, काठमाडौं । चालु आर्थिक वर्ष २०८१/८२ को १० महिनामा झन्डै १० हजार विद्युतीय कार, जीप तथा भ्यान (ईभी) आयात भएको छ ।

चालु आर्थिक वर्ष (आव) को वैशाख मसान्तसम्म नेपालमा ९ हजार ८५९ वटा चारपाङ्ग्रे ईभी आयात भएको भन्सार विभागको तथ्यांक छ । नेपालले यस अवधिमा आयात गरेका ईभीको मूल्य २३ अर्ब १० करोड ५७ लाख रुपैयाँ छ ।

यो बीचमा नेपालमा ९ वटा अनऐसेम्बल इभी समेत चीनबाट नेपाल आएका छन् । नेपालमा ईभीहरूमध्ये अधिकांश चीनबाट आएका छन् । यस अवधिमा चीनबाट ७ हजार ३ सय ५३ वटा ईभी आयात भएका हुन् ।

दोस्रोमा भारतबाट २ हजार ४ सय ११ ईभी आएका छन् । यस्तै, इन्डोनेसिया, कोरिया, जर्मनी, मलेसिया र अमेरिका जस्ता देशबाट पनि ईभी आयात भएको छ ।

ईभी आयातबाट सरकारलाई १० महिनामा १४ अर्ब २५ करोड ११ लाख रुपैयाँ राजस्व आएको छ ।