विपनाले साइन् गरिन् ‘आ बाट आमा’

निर्देशक तथा निर्माता चन्द्र पन्तसँग सम्झौतापत्रमा हस्ताक्षर गरेपछि अभिनेत्री विपना थापा (दायाँ) ।

News Summary

Generated by OK AI. Editorially reviewed.

अभिनेत्री विपना थापा ‘आ बाट आमा’ फिल्ममा मुख्य भूमिकामा अनुबन्धित भएकी छन्।
निर्देशक चन्द्र पन्तले यो संवेदनाप्रेरित फिल्मलाई भावुक कथा भएको बताए।
फिल्मको प्रदर्शन १५ फागुनमा तय भएको छ।

काठमाडौं । अभिनेत्री विपना थापा निर्माण हुन लागेको फिल्म ‘आ बाट आमा’मा अनुबन्धित भएकी छन् । यो फिल्मलाई उनको कमब्याक फिल्म ‘ह्रस्व दीर्घ’ फेम्ड चन्द्र पन्तले निर्देशन गर्दैछन् ।

बैशाख २५ गते चलचित्र विकास बोर्डबाट निर्माण इजाजत लिँदै पन्तले विपना र किस्मत सिंहलाई कलाकारको रुपमा चिनाएका थिए । थापाले ‘ह्रस्वदीर्घ’बाट झण्डै डेढदशकपछि पुनरागमन गरेकी थिइन् ।

फिल्ममा थापाले आमाको चरित्रमा शीर्ष भूमिका निर्वाह गर्नेछिन् । विपनाको कास्टिङबारे निर्देशक पन्तले भने, ‘विपना थापाको नै मुख्य भूमिका हो । उहाँको यस फिल्ममा राम्रो क्यारेक्टर छ ।’

उनले बन्न लागेको फिल्म निकै संवेदनाप्रेरित हुने बताए । ‘यसमा दर्शकलाई इमोसनल बनाउने कथा छ । त्यसैले यो क्यारेक्टर विपना थापालाई नै सुहाउने भएर अनुबन्ध गरेका हौँं’ निर्देशक पन्तले भने ।

भदौदेखि छायांकन तयारीमा रहेको फिल्मको कथाले आफूलाई प्रोजेक्ट गर्न प्रेरित गरेको विपना बताउँछिन् । कथा सुन्दा निकै भावुक भएको उनले बताएकी छन् ।

उनले भनिन, ‘कथा सुन्दाखेरी मेरो घाँटी ख्याप्प भएर सुकेको थियो । स्टोरी नै यति पावरफुल, यति स्ट्रोङ छ । आमा भन्ने फिल्म मैले पहिला पनि रेशराज आचार्य डिरेक्टर साबको गरेको थिएँ । अरु पनि थुप्रै आमा हुने फिल्म बनेको छ । यो फिल्मको स्टोरी चाहिँ छुट्टै किसिमको छ । जुन फिल्म हेरिसकेपछि मात्रै थाहा हुन्छ ।’

फिल्मले आमा र सन्तानबीचको मर्मस्पर्शी सम्बन्धको कथा पेश गर्ने उनले बताइन् । अन्य कलाकार र प्राविधिकको पनि टुङ्गो छिट्टै लाग्ने निर्देशक पन्तले बताए । फिल्मको प्रदर्शन १५ फागुनलाई तय छ ।