२०८२ जेठ ११ गते ९:५६ 
News Summary
Generated by OK AI. Editorially reviewed.- अस्ट्रेलियन बलर जोश हेजलवूड आईपीएल २०२५ को प्लेअफअघि रोयल च्यालेन्जर्स बेंगलुरुमा फर्किने निश्चित देखिएको छ।
- उनी चोटपछिको विश्रामपछि पुनः फिट भएर टोलीमा फर्किने भएका हुन् ।
- बेंगलुरु शीर्ष दुई स्थानमा पुग्न प्रयासरत भए पनि पछिल्लो खेलमा पराजित भएको थियो।
११ जेठ, काठमाडौं । अस्ट्रेलियन बलर जोश हेजलउड आईपीएल २०२५ को प्लेअफअघि रोयल च्यालेन्जर्स बेंगलुरुको टोलीमा फर्किने लगभग पक्का देखिएको छ ।
मंगलबार अन्तिम लिग खेल र त्यसपछि प्लेअफ खेल्न लागेको बेंगलुरुका प्रमुख बलर हेजलउड चोटपछिको विश्रामपछि टोलीमा फर्किने भएका हुन् । बेंगलुरुले पनि उनी फर्कने संकेत गर्दै सामाजिक सञ्जालमा पोस्ट गरेको छ ।
हेजलउडले यस सिजन आरसीबीका लागि १० खेलमा १८ विकेट लिँदै उत्कृष्ट प्रदर्शन गरेका छन् । उनले अप्रिल २७ यता खेल खेलेका थिएनन् भने भारत–पाकिस्तानबीचको विवादका कारण आईपीएल रोकिँदा अस्ट्रेलिया फर्किएका थिए।
Lost and Found 🤔 pic.twitter.com/jthyWfoC8o
— Royal Challengers Bengaluru (@RCBTweets) May 24, 2025
हेजलउडले अष्ट्रेलियामा पुनः स्वास्थ्य लाभ लिएर प्रशिक्षण सुरु गरेका थिए। उनी आगामी वर्ल्ड टेस्ट च्याम्पियनसिपको फाइनलको तयारी स्वरुप ब्रिसबेनमा अस्ट्रेलियाको टेस्ट टिमसँग प्रशिक्षण गर्दै थिए ।
प्रशिक्षणमा उनी फिट देखिएपछि फेरि बेंगलुरुको टोलीमा फर्किने भएका हुन् ।
बेंगलुरु यसअघि नै प्लेअफमा पुगिसकेको छ तर शुक्रबार सनराइजर्स हैदराबादसँगको खेलमा पराजित भएपछि शीर्ष दुई स्थानमा पुग्ने आशामा केही झट्का लागेको छ।
बेंगलुरु मात्र नभएर शीर्ष २ को होडमा रहेका तीन टोलीहरू नै पछिल्लो खेलमा पराजित भएकाले शीर्ष दुईको पूर्णरूपमा टुंगो लाग्न अन्तिम खेलसम्म नै पर्खनुपर्ने छ ।
-क्रिकइन्फोबाट
प्रतिक्रिया 4