हरेक क्षेत्रमा लैङ्गिक समानता कायम हुनुपर्छः नेता कोइराला

News Summary

Generated by OK AI. Editorially reviewed.

नेता डा. शेखर कोइरालाले लैङ्गिक समानता कायम गर्न राजनीतिक दलले काम गर्नुपर्ने बताए।
उनले समान कामको समान ज्याला र महिला श्रमिकको पारिश्रमिकमा भेदभाव अन्त्य गर्न ट्रेड युनियनको भूमिका आवश्यक रहेको बताए।
कार्यक्रममा महिला श्रमिकको हक अधिकार, संरक्षण र वैदेशिक रोजगार प्रशिक्षणका विषयमा १०० जनाको सहभागिता थियो।

१३ जेठ, मोरङ । नेपाली कांग्रेसका नेता डा. शेखर कोइरालाले मुलुकका हरेक क्षेत्रमा लैङ्गिक समानता कायम हुनुपर्ने बताएका छन् । जिपी कोइराला लेबर फाउण्डेशन नेपालद्वारा आज विराटनगरमा आयोजित ‘लैङ्गिक समानता’ विषयक प्रशिक्षण कार्यक्रममा उनले राजनीतिक दलले लैङ्गिक समानतालाई व्यवहारमा उतार्न आफ्नो क्षेत्रबाट काम गर्नुपर्नेमा जोड दिए ।

नेता कोइरालाले समान कामको समान ज्याला भनिए पनि महिला श्रमिकलाई दिने पारिश्रमिकमा भेदभाव भएकाले त्यसको अन्त्यका लागि ट्रेड युनियनले आवाज उठाउनुपर्ने बताए ।
उनले पार्टीको केन्द्रदेखि जिल्ला तहसम्म ट्रेड युनियनको प्रतिनिधित्वि हुनुपर्ने विगतदेखि आफूले माग गरेको चर्चा गर्दै यसबाट श्रमिकको हकहितमा युनियनले उठाएको माग पूरा हुने विश्वास व्यक्त गरे ।

नेकाका केन्द्रीय सदस्यद्वय अमृत अर्याल र रामकृष्ण भट्टराईले आर्थिक उपार्जनमा वृद्धि गरी लैङ्गिक समानता कायम गर्नुपर्ने सुझाव दिए । फाउण्डेशनकी अध्यक्ष सुधा दाहाल, नेकां मोरङका कार्यवाहक सभापति भत्ति माझी, ट्रेड युनियन कांग्रेसका नारायणबाबु कार्की, फाउण्डेशनका मातृका शिवाकोटीले फाउण्डेशनले विस २०६५ देखि महिला श्रमिकको हक अधिकारका क्षेत्रमा कार्य गरिरहेको जानकारी दिए ।

कार्यक्रम महिला श्रमिकको संरक्षण, वैदेशिक रोजगार प्रशिक्षण, शिप प्रदान र सचेतनाजस्ता कार्यक्रममा जिल्लाका १०० जनाको सहभागिता रहेको छ ।