एमालेले १५ गते आयोजना गर्ने ‘गणतन्त्र उत्सव’ कसैप्रति लक्षित छैन : शंकर पोखरेल

फाइल फोटो

News Summary

Generated by OK AI. Editorially reviewed.

नेकपा (एमाले) का महासचिव शङ्कर पोखरेलले १५ जेठमा मनाइने गणतन्त्र उत्सवलाई विरोध लक्षित नभएको बताए।
उनले गणतन्त्र नेपाली जनताको विजयको प्रतीक भएकाले उत्सव झाँकीसहित मनाउने बताए।
पोखरेलले लोकतन्त्र र गणतन्त्रको शिक्षा विद्यालय तहबाटै आवश्यक रहेको र एमालेले राष्ट्रिय स्वाधीनता र रक्षाका लागि लड्ने बताए।

१३ जेठ, काठमाडौं । नेकपा (एमाले) महासचिव शङ्कर पोखरेलले आफ्नो पार्टीले यही जेठ १५ गते मनाउन लागिएको गणतन्त्र उत्सव कसैको विरोध लक्षित नभएको बताएका छन् । ललितपुर, च्यासलस्थित एमाले केन्द्रीय कार्यालयमा मंगलबार आयोजित पार्टीका विभागका सदस्यहरुको विस्तारित भेलालाई सम्बोधन गर्दै उनले गणतन्त्र नेपाली जनताको सबैभन्दा ठूलो उत्सव भएकाले जनताको विजयका रुपमा मनाउन लागेको जानकारी दिए ।

‘जनताको बलिदानी सङ्घर्षबाट प्राप्त लोकतन्त्र, गणतन्त्र जोगाउन जनताले यो दिन हाम्रो दिन हो भन्ने अनुभूति दिलाउन पनि एमालेले उत्सवका रुपमा झाँकीसहित मनाउन लागेको हो’, उनले भने । महासचिव पोखरेलले गणतन्त्र–लोकतन्त्रको बारेमा विद्यालय तहको पाठ्यक्रममा राख्न आवश्यक रहेको बताए ।

उनले गणतन्त्रपछि जन्मिएका युवाले बलिदानीपूर्ण सङ्घर्षबाट लोकतन्त्र–गणतन्त्र स्थापना भएको हो भन्ने जानकारी दिन पनि विद्यालय शिक्षामै लोकतन्त्र र गणतन्त्रबारे पढाउनुपर्ने आवश्यकता औँल्याए । राष्ट्रिय स्वाधीनता र रक्षाका लागि सबैभन्दा लड्ने पार्टी एमाले भएका कारणसबैभन्दा बढी प्रहार एमालेमाथि नियोजित ढङ्गले भइरहेको उनको भनाइ छ ।