राप्रपाले भन्यो- हाम्रा समर्थकलाई नाकामा अनावश्यक सोधपुछ भइरहेको छ

फाइल तस्वीर

News Summary

Generated by OK AI. Editorially reviewed.

राप्रपा ले राजसंस्था पक्षधरहरूको आन्दोलनमा सहभागी हुन काठमाडौं आउने क्रममा नाकामा अवरोध भएको आरोप लगाएको छ।
प्रवक्ता श्रेष्ठले समर्थकहरूलाई अनावश्यक सोधपुछ र आवागमनमा बाधा पुगेको बताएर प्रशासनको ध्यानाकर्षण गराएका छन्।
राजसंस्था पुनस्थापना माग गर्दै राप्रपा र अन्य दलहरूले काठमाडौंमा प्रदर्शन गर्दैछन्।

१५ जेठ, काठमाडौं । राष्ट्रिय प्रजातन्त्र पार्टी (राप्रपा) ले राजसंस्था पक्षधरहरू आन्दोलनमा सहभागी हुन आउने क्रममा विभिन्न नाकामा अवरोध भइरहेको आरोप लगाएको छ ।

पार्टी प्रवक्ता मोहनकुमार श्रेष्ठले सामाजिक सञ्जालमार्फत विभिन्न भूगोलबाट काठमाडौं आइरहेका आफ्ना समर्थकहरूलाई नाकामा अनावश्यक सोधपुछ गर्ने काम भइरहेको बताएका हुन् ।

‘राजसंस्था पक्षधरहरूको आजबाट हुने आन्दोलनमा सहभागी हुन नौबिसे हुँदै काठमाडौं आइरहेका विभिन्न भूगोलका राष्ट्रवादी साथीहरूलाई रोक्ने, अनावश्यक सोधपुछ गर्ने र आवागमनमा बाधा उत्पन्न गरिएको भन्ने सूचना आएको छ,’ श्रेष्ठले भनेका छन् ।

साथै, उनले त्यस्ता क्रियाकलाप नगर्न र सहज वातावरण बनाउन पनि प्रशासनको ध्यानाकर्षण गराएका छन् ।

‘सहज वातावरण बनाउन जिम्मेवारीपूर्वक प्रशासनको ध्यानाकर्षण गराउँदछु,’ प्रवक्ता श्रेष्ठले भनेका छन् ।

राजसंस्था पुनस्थापना लगायतका माग राख्दै राप्रपासहितका दलहरूको समर्थनमा राजावादीहरूले आज काठमाडौंमा प्रदर्शन गर्दैछ ।