हेल्मेटको भन्सार बढ्यो, महँगिने

News Summary

Generated by OK AI. Editorially reviewed.

आर्थिक विधेयक अनुसार हेल्मेटमा भन्सार शुल्क १५ प्रतिशतबाट २० प्रतिशत पुर्‍याइएकाे छ।
जलयात्रा व्यवसायीलाई भने पहिलोपटक १०० हेल्मेट आयात गर्दा ५ प्रतिशत भन्सार लाग्नेछ।
चालू आर्थिक वर्षको १० महिनामा ६७ करोड ३९ लाख रुपैयाँ बराबरको हेल्मेट आयात भएको छ।

१६ जेठ, काठमाडौं । मोटरसाइकल, स्कुटर प्रयोगकर्ता वा निर्माण क्षेत्रमा काम गर्ने जनशक्तिले प्रयोग गर्ने हेल्मेटमा लाग्दै आएको भन्सार बढेको छ । यसअघि हेल्मेटमा १५ प्रतिशत भन्सार लाग्दै आएकोमा अब २० प्रतिशत लाग्ने आर्थिक विधेयकमा उल्लेख छ ।

तर, पर्यटन विभागको सिफारिसमा जलयात्राको व्यवसाय गर्ने राफ्टिङ सेवा सञ्चालन गर्ने व्यवसायीले आफ्नो व्यवसाय सञ्चालनका लागि १ सय थान यस्तो हेल्मेट पहिलोपटक आयात गर्दा भने ५ प्रतिशत मात्रै भन्सार महसुल लिने व्यवस्था पनि आर्थिक विधेयकमा गरिएको छ ।

चालू आर्थिक वर्षको १० महिनामा ६७ करोड ३९ लाख रुपैयाँका हेल्मेट आयात भएको छ । यस अवधिमा ६१ लाख ९१ हजार थान हेल्मेट आयात भएको भन्सार विभागको तथ्यांक छ । त्यसमध्ये ४५ लाख ५५ हजार हेल्मेट भारतबाट आयात भएका हुन् ।