कलाकार गौतमको परिवारलाई ५० हजार सहयोग

News Summary

Generated by OK AI. Editorially reviewed.

चलचित्र विकास बोर्डले क्यान्सरले पीडित कलाकार घनश्याम गौतमको परिवारलाई ५० हजार रुपैयाँ आर्थिक सहायता प्रदान गर्यो।
गौतमको निधन जेठ १९ गते भक्तपुरस्थित क्यान्सर अस्पतालमा भएको थियो।
बोर्डले यसअघि पनि गौतमको उपचारमा १ लाख रुपैयाँ सहयोग गरेको थियो।

काठमाडौं । ‘नक्कली प्रचण्ड’ नामक पात्रको भूमिकामा चर्चित कलाकार घनश्याम गौतमको केही दिनअघि क्यान्सरको कारण निधन भयो ।

उनको निधनमा शोक व्यक्त गर्दै चलचित्र विकास बोर्डले परिवारलाई ५० हजार रुपैयाँको आर्थिक सहायता प्रदान गरेको छ । बोर्ड अन्तर्गतको चलचित्रकर्मी कल्याणकारी कोषमार्फत सहायता उपलब्ध गराइएको हो ।

बोर्ड अध्यक्ष दिनेश डिसी, कोष संयोजक बसुन्धरा भुसाल, सदस्यहरू मोहन निरौला, जनकदीप पराजुली र रवीन्द्र खड्काले पशुपतिस्थित क्रियापुत्री भवनमा पुगेर सहयोग हस्तान्तरण गरेका हुन् ।

यसअघि पनि गौतमको उपचारमा बोर्डले १ लाख रुपैयाँ प्रदान गरेको थियो । क्यान्सर पीडित गौतमको जेठ १९ गते राति भक्तपुर ताथलीस्थित क्यान्सर अस्पतालमा निधन भएको थियो ।

झापा गौरादहमा जन्मिएर नेपाली टेलिभिजन सिरियलमा उनी नक्कली प्रचण्ड नामक पात्रको रुपमा चर्चित रहे । केही वर्षदेखि भक्तपुरस्थित कटुन्जेमा परिवारसहित बसोबास गर्दै आएका थिए ।

कोषमार्फत अप्ठ्यारोमा परेका कलाकार, चलचित्रकर्मी वा तिनका परिवारलाई सहयोग पुर्‍याउने उद्देश्यअनुसार राहत प्रदान गरिएको अध्यक्ष डीसीले बताए ।