२०८२ जेठ २३ गते २२:१४ 
News Summary
Generated by OK AI. Editorially reviewed.- इंग्लिस प्रिमियर लिग क्लब टोटनहम हटस्परले प्रशिक्षक एन्ज पोष्टेकोग्लुलाई बर्खास्त गरेको छ।
- पोष्टेकोग्लुले १७ वर्षपछि मुख्य उपाधि जिताए पनि प्रिमियर लिगमा खराब प्रदर्शनका कारण बर्खास्त भए।
- ब्रेन्टफोर्डका प्रशिक्षक थोमस फ्र्याङ्कलाई नयाँ प्रशिक्षकको सम्भावना रहेको छ।
२३ जेठ, काठमाडौं । इंग्लिस प्रिमियर लिग क्लब टोटनहम हटस्परले प्रशिक्षक एन्ज पोष्टेकोग्लुलाई बर्खास्त गरेको छ। उनी २ वर्षअघि नियुक्त भएकै दिन अर्थात् जुन ६ मा बर्खास्तीमा परेका हुन् ।
पोष्टेकोग्लुले टिमलाई १७ वर्षपछि मुख्य उपाधि दिलाएका थिए । २ साताअघि भएको युईएफए युरोपा लिगको फाइनलमा म्यानचेस्टर युनाइटेडलाई १-० ले हराउँदै टोटनहमले ४१ वर्षपछि युरोपेली उपाधि जितेको थियो भने १७ वर्षपछि कुनैपनि उपाधि जितेको थियो ।
युरोपा लिग जितेपनि प्रिमियर लिगमा भने टोटनहमको प्रदर्शन खराब रह्यो । सिजनभर २२ खेल हारेको टोटनहम ३८ खेलबाट ३८ अंकसहित १७औं स्थानमा रह्यो, जुन क्लबको प्रिमियर लिग इतिहासमै सबैभन्दा खराब प्रदर्शन हो।
पोष्टेकोग्लु दुई वर्षअघि सेल्टिकबाट टोटनहम आएका थिए र चार वर्षको सम्झौता गरेका थिए। उनी अब सम्झौताको आधा अवधि पूरा गर्दै क्लबबाट बाहिरिएका छन्।
ब्रेन्टफोर्डका प्रशिक्षक थोमस फ्र्याङ्कलाई नयाँ प्रशिक्षक हुन सक्ने सम्भावना रहेको छ । उनीसँग क्लब छाड्न मिल्ने ‘रिलिज क्लज’ भए पनि ब्रेन्टफोर्डसँग औपचारिक वार्ता भने अझै सुरु भएको छैन।
-स्काइ स्पोर्ट्सबाट
प्रतिक्रिया 4