२०८२ जेठ २६ गते १४:३६ 
News Summary
Generated by OK AI. Editorially reviewed.- बेंगलुरुमा आईपीएल विजेता समारोहमा भीडभाड र व्यवस्थापनको अभावले ११ जनाको मृत्यु भयो।
- प्रहरीले आरसिबी, आयोजनाका कम्पनी र केएससीएविरुद्ध एफआईआर दर्ता गरेको छ।
- भारतीय क्रिकेट बोर्डले घटनापछि आगामी सिजनमा प्रतिबन्धको सम्भावना र अनुसन्धानको तयारी गरिरहेको छ।
२६ जेठ, काठमाडौं । आईपीएल २०२५ को उपाधि विजेता रोयल च्यालेन्जर्स बेंगलुरु (आरसिबी)ले विजय उत्सव मनाउने क्रममा भएको घटनामा परी ११ जनाको मृत्यु भएपछि अहिले यस विषय चर्चामा छ ।
पहिलो पटक उपाधि जितेको खुसीयालीमा आयोजना गरिएको विजय जुलुस दुःखद घटनामा परिणत भएको थियो । अत्यधिक भीड र व्यवस्थापनमा कमीका कारण भएको भागदौडमा धेरै घाइते पनि भएका छन्।
बेंगलुरु प्रहरीले आरसिबी, कार्यक्रम व्यवस्थापन कम्पनी डीएनए इन्टरटेनमेन्ट, र कर्नाटक राज्य क्रिकेट संघ (केएससीए)विरुद्ध एफआईआर दर्ता गरेको छ। आरसिबीका मार्केटिङ प्रमुख निखिल सोसालेलाई पक्राउ गरिएको छ।
यसैबीचमा यतिबेला आईपीएलको आगामी सिजनमा फ्रेन्चाइज टोलीलाई प्रतिबन्ध लाग्ने कुराले पनि व्यापक चर्चा पाइरहेको छ । सामाजिक सञ्जालमा पनि यस विषयलाई लिएर विभिन्न टिप्पणीहरू भइरहेका छन् ।
यद्यपी भारतीय क्रिकेट बोर्ड बीसीसीआईले हालसम्म कुनै निर्णय भने लिएको छैन । बोर्डले यो कार्यक्रम आरसिबीको निजी आयोजनामा भएको भन्दै आफू भने सहभागी नभएको जनाएको छ।
बीसीसीआई सचिव देवजित साइकियालाई उद्धृत गर्दै भारतीय इकोनोमिक टाइम्सले लेखेको छ, ‘यो दुर्भाग्यपूर्ण घटना हो, अब बीसीसीआईले चुप लागेर बस्न सक्दैन। क्रिकेट भारतको हो, यस्तो घटना दोहोरिन नदिन केही कदम चालिनेछ।”
आईपीएलको इतिहासमा यसअघि पनि २०१५ मा चेन्नई सुपर किंग्स र राजस्थान रोयल्स स्पट-फिक्सिङ प्रकरणमा निलम्बित भएका थिए। तर यो घटना अझ गम्भीर छ किनभने यहाँ जनधनको क्षति भएको छ।
यदि कर्नाटक सरकारले गरिरहेको अनुसन्धानले गम्भीर लापरबाही पुष्टि गर्यो भने, बीसीसीआईमाथि कडा कदम चाल्न दबाब पर्न सक्ने देखिएको छ।
प्रतिक्रिया 4