अत्यधिक गर्मी बढेपछि बेलौरीमा २ दिन विद्यालय बिदा

News Summary

Generated by OK AI. Editorially reviewed.

बेलौरी नगरपालिकाले अत्यधिक गर्मी बढेपछि आज र भोलि विद्यालय बिदा दिने निर्णय गरेको छ।
नगरप्रमुख पोतिलाल चौधरीले बर्खे बिदाबाट मिलान हुनेगरी विद्यालय बिदा गरिएको जानकारी दिए।
गर्मीका कारण सर्वसाधारणलाई बाह्य क्षेत्रमा हिँडडुल गर्न समस्या र स्वास्थ्य समस्या देखापरेको छ।

२७ जेठ, कञ्चनपुर । बेलौरी नगरपालिकाले अत्यधिक गर्मी बढेपछि दुई दिन विद्यालय बिदा दिने निर्णय गरेको छ ।

गर्मीका कारण शिक्षक, विद्यार्थी र कर्मचारीको स्वास्थ्यमा पर्ने प्रतिकूल असरलाई मध्यनजर गरी आज र भोलि नगरभित्र विद्यालय बिदा दिने निर्णय गरिएको हो ।

नगरप्रमुखस्तरीय निर्णयअनुसार विद्यालयमा बिदा दिइएको नगरप्रमुख पोतिलाल चौधरीले जानकारी दिए । बर्खे बिदाबाट मिलान हुनेगरी नगरभित्रका सामुदायिक तथा संस्थागत विद्यालयमा गर्मी बिदा दिइएको उनले बताए ।

गर्मी बढेसँगै सर्वसाधारणलाई बाह्य क्षेत्रमा हिँडडुल गर्न समस्या हुने गरेको छ ।

दिउँसोका बेला बजार तथा राजमार्ग क्षेत्रमा सर्वसाधारणको आगमन कम हुँदै गएको छ ।

गर्मीका कारण रिङ्गटा लाग्ने, टाउको दुख्ने, ज्वरो आउने, आँखा पाक्नेलगायत स्वास्थ्य समस्या लिएर अधिकांश बिरामी स्वास्थ्य संस्थामा पुग्ने गरेका स्वास्थ्यकर्मीले बताएका छन् ।