२०८२ असार २ गते १६:४८ 
News Summary
Generated by OK AI. Editorially reviewed.- पाँचपोखरी क्रिकेट क्लब र मेलम्ची नगरपालिका संयुक्त रूपमा सिन्धुपाल्चोक जिल्लास्तरिय टी-२० प्रतियोगिताको च्याम्पियन बने।
- वर्षाका कारण फाइनल खेल नतिजाविहीन भएपछि दुवै टोलीलाई विजेता घोषणा गरिएको हो।
- दुवै टोलीले पुरस्कार रकम पनि बाँडेका छन्।
२ असार, काठमाडौं । पाँचपोखरी क्रिकेट क्लब र मेलम्ची नगरपालिका संयुक्तरुपमा सिन्धुपाल्चोक जिल्लास्तरिय पाँचपोखरी टी-२० प्रतियोगिताको च्याम्पियन बनेका छन् ।
कीर्तिपुरस्थित त्रिवि क्रिकेट मैदानमा सोमबार तय भएको फाइनल वर्षाका कारण नतिजाविहीन भएपछि दुवै टोलीलाई संयुक्त रूपमा विजेता घोषणा गरिएको हो ।
टस हारेर ब्याटिङको निम्तो पाएको पाँचपोखरी १७.४ ओभरमा एक विकेट गुमाउँदै १३३ रन बनाएको अवस्थामा खेल रोकिएको थियो ।
खेल रोकिनुअघि पाँचपोखरीका कप्तान सार्थक धिताल ५२ बलमा सात चौकाको मद्दतले ६१ तथा बुद्धी तामाङ ४४ बलमा दुई चौकासहित ३३ रन बनाएर खेलिरहेका थिए । यसैगरी रोशन विक २४ रन बनाए आउट भए ।
मेलम्चीका लागि कप्तान रिन्जिङ तामाङले एक विकेट लिए ।
संयुक्त रूपमा विजेता घोषित भएपछि दुवै टोलीले पुरस्कार रकम पनि बाँडेका छन् । प्रतियोगिताको विजेताले १ लाख र उपविजेताले ५० हजार पाउने तय रहेकामा अब दुवै रकम जोडेर हुन आउने रकमको आधा अर्थात् ७५ हजार प्राप्त गरेका छन् ।
वर्षाका कारण पहिलो सेमिफाइनल रद्द भएपछि पाँचपोखरी समूह विजेताको हैसियतले फाइनल प्रवेश गरेको थियो । यसैगरी दोस्रो सेमिफाइनलमा मेलम्चीले द माइटी साँगाचोका क्लबविरुद्ध सुपर ओभरमा जित निकालेको थियो ।
पाँचपोखरी थाङपाल गाउँपालिका र सिन्धुपाल्चोक जिल्ला क्रिकेट संघको संयुक्त आयोजनामा जारी प्रतियोगितामा सात टोलीले प्रतिस्पर्धा गरेका थिए ।
प्रतिक्रिया 4