इलाममा लम्पीस्किन संक्रमित गोरु मर्‍यो, १०६ चौपाया संक्रमित

माई नगरपलिका अशक्त अवस्थामा रहेको संक्रमित बाच्छी

News Summary

Generated by OK AI. Editorially reviewed.

इलाममा यस वर्ष पहिलो पटक ‘लम्पी स्किन’ संक्रमणबाट गोरुको मृत्यु पुष्टि भयो।
भेटरिनरी केन्द्रले ९ वटा पालिकामा प्रकोप देखिएको र रोकथामका लागि खोप र सतर्कता अपनाउन आग्रह गरेको छ।
संक्रमित जनावरलाई अलग राख्न र तुरुन्त निकायसँग सम्पर्क गर्न पशुपालकहरूलाई सुझाव दिइएको छ।

५ असार, इलाम । इलाममा यस वर्ष पहिलो पटक ‘लम्पी स्किन’ संक्रमणबाट गोरुको मृत्यु भएको पुष्टि भएको छ । इलामको रोङ गाउँपालिकामा संक्रमित गोरु मरेको हो । भेटरिनरी अस्पताल तथा पशु सेवा विज्ञ केन्द्र, इलामका प्रमुख राघवेन्द्र तिवारीले लम्पीका कारण गोरुको मृत्यु भएको पुष्टि गरे ।

यस वर्ष मात्रै इलामका १० पालिकामध्ये ९ वटा पालिकामा लम्पीस्किन रोगको प्रकोप देखिएको भेटरिनरी अस्पताल तथा पशु सेवा विज्ञ केन्द्र, इलामले जानकारी दिएको छ । सबैभन्दा धेरै संक्रमित चौपाया माई नगरपालिकामा ३० वटा भेटिएको छ ।

त्यसपछि रोङ गाउँपालिकामा २५, फाकफोकथुम गाउँपालिकामा १४, देउमाई नगरपालिकामा १२, माईजोगमाई गाउँपालिकामा ७, सुर्योदय र चुलाचुली गाउँपालिकामा ५/५, र माङ्सेवुङ तथा इलाम नगरपालिकामा ४/४ चौपाया संक्रमित भएका छन् । भेटरिनरी अस्पताल तथा पशु सेवा विज्ञ केन्द्रले स्थानीय निकायसँग समन्वय गरी लम्पीविरुद्धको खोपलाई तिब्र पारेको छ भने निगरानी र रोकथामको काम अघि बढाइएको छ ।

संक्रमण रोकथामका लागि केन्द्रले पशुपालकहरूलाई सतर्क रहन, संक्रमित जनावर अलग राख्न र तुरुन्त नजिकको भेटरिनरी, पालिका वा वडा कार्यालयमा सम्पर्क गर्न आग्रह गरेको छ ।