आईएमई ग्रुपको डेढ अर्ब लगानीमा रौतहटमा खुल्यो पहिलो फाइबर सिमेन्ट बोर्ड उद्योग

११ असार, काठमाडौं । आइएमई ग्रुपको डेढ अर्ब लगानीमा नेपालमै पहिलो पटक अन्तर्राष्ट्रिय गुणस्तरको फाइबर सिमेन्ट बोर्ड उत्पादन गर्ने ‘एभरेस्ट फाइबर सिमेन्ट बोर्ड उद्योग’ सञ्चालनमा आएको छ ।

उद्योग, वाणिज्य तथा आपूर्तिमन्त्री दामोदर भण्डारीले बुधबार काठमाडौंमा आयोजित कार्यक्रममा उद्योग उद्घाटन गर्दै उक्त उद्योगबाट उत्पादित फाइबर सिमेन्ट बोर्ड तथा त्यसबाट निर्माण हुने विविध उत्पादनलाई औपचारिक रूपमा सार्वजनिक गरे ।

कार्यक्रममा मन्त्री भण्डारीले स्वदेशमै गुणस्तरीय, वातावरणमैत्री र अत्याधुनिक प्रविधिमा आधारित उद्योगको स्थापना हुनु नेपालको औद्योगिक विकासतर्फको महत्त्वपूर्ण पाइला रहेको बताए ।

मन्त्री भण्डारीले यो उद्योगले केवल आयात प्रतिस्थापन मात्र होइन, निर्माण क्षेत्रलाई दिगो विकासको बाटोमा डोहोर्‍याउने भएकाले सरकारले उत्पादनमुखी लगानीलाई सधैं प्रोत्साहन दिने उल्लेख गरे ।

कार्यक्रममा नेपाल उद्योग वाणिज्य महासंघ अध्यक्ष तथा आइएमई ग्रुपका अध्यक्ष चन्द्रप्रसाद ढकालले स्वदेशी कच्चापदार्थ र स्थानीय स्रोत प्रयोग गरी निर्माण क्षेत्रमा योगदान पुर्‍याउने गरी नयाँ उद्योग स्थापना गरेको बताए ।

यसले देशभित्र रोजगारी सिर्जना गर्ने र नेपालमै उत्पादन हुने भएकाले आयात प्रतिस्थापन भई ठूलो मात्रामा विदेशी मुद्रा बाहिरिनबाट जोगिँदा आत्मनिर्भर अर्थतन्त्रतर्फको मार्ग प्रशस्त गर्ने पनि अध्यक्ष ढकालले उल्लेख गरे ।

स्वदेशी सिप, स्थानीय स्रोत र सम्भावना मार्फत नेपालभित्रै अन्तर्राष्ट्रिय स्तरका निर्माण सामग्री उत्पादन सम्भव भएको सन्देश यस उद्योगले दिएको पनि अध्यक्ष ढकालको भनाइ थियो ।

आइएमई ग्रुप अन्तर्गत करिब डेढ अर्ब रुपैयाँको लगानीमा स्थापना गरिएको यो उद्योग रौतहट फतुवा विजयपुर नगरपालिका–६ मा छ । यो उद्योगमा कच्चापदार्थ मिसावटदेखि बोर्ड कटिङ, प्रेसिङ र ड्रइङसम्मका सम्पूर्ण प्रक्रिया पूर्णरूपमा अटोमेटेड प्रविधिमा आधारित रहेको कम्पनीले जनाएको छ ।

उद्योगले दैनिक ७५ हजार वर्गफिट सिमेन्ट फाइबर बोर्ड उत्पादन गर्न सक्ने क्षमता राख्ने समेत कम्पनीको भनाइ छ । यहाँ उत्पादित बोर्ड ४ फिट लम्बाइ, ८ फिट चौडाइ र ४ एमएमदेखि ३० एमएम मोटाइमा उपलब्ध छन् । यी बोर्ड लचकदार, अग्नि–प्रतिरोधी, घाम–पानीले असर नपर्ने, वातावरणमैत्री तथा टिकाउ रहेको कम्पनीको दाबी छ ।

फाइबर सिमेन्ट बोर्डको प्रयोग भवनको बाहिरी भाग, पार्टिसन, फल्स सिलिङ, मोडुलर किचेन, इको प्यानल लगायत विभिन्न संरचनामा गरिन्छ । इँटा र प्लास्टरको विकल्पमा पूर्ण संरचना निर्माण समेत गर्न सकिन्छ ।

प्राकृतिक प्रकोप जस्तै, भूकम्प, बाढी वा पहिरोका बेला आपतकालीन संरचना निर्माणमा समेत यस उद्योगका उत्पादित बोर्ड छिटो, सस्तो र दिगो विकल्प बन्ने कम्पनीको विश्वास छ । प्लास्टर वा रङको झन्झट नहुने भएकाले समय र लागत बच्ने भएको छ ।

यस उद्योगले स्थानीय रोजगार प्रवर्द्धनमा जोड दिएको छ । हाल करिब २ सय जनाले प्रत्यक्ष वा अप्रत्यक्ष रोजगारी पाएको कम्पनीले जनाएको छ । जसमा ९८ प्रतिशतभन्दा बढी स्थानीय जनशक्ति र ४० प्रतिशतभन्दा बढी महिला कामदार राखिएको छ ।

उनीहरू प्रोसेससङदेखि प्याकिङसम्मका सबै काममा संलग्न छन् । एभरेस्ट फाइबर सिमेन्ट बोर्ड प्रालिले वातावरणमैत्री, गुणस्तरीय र प्रतिस्पर्धी उत्पादन मार्फत निर्माण क्षेत्रमा महत्त्वपूर्ण योगदान गर्ने लक्ष्य लिएको जनाएको छ ।