एमाले टोली नेता बनेर चीन पुगेकी विद्याको सदस्यताबारे २ महिनापछि बखेडा !

४ साउन, काठमाडौं । पूर्व राष्ट्रपति विद्या भण्डारी भण्डारी पार्टी राजनीतिमा फर्कन हुन्छ कि हुँदैन भन्ने तर्क–वितर्क अन्यत्र जारी रहे पनि स्वयं नेकपा एमालेका लागि भने यो बहस पुरानो भइसक्यो ।

भण्डारीले पोहोर २०८१ जेठमै पार्टी सदस्यता नवीकरण गरिसक्दा एमालेमा कुनै पनि नेताले यसलाई बहसयोग्य सम्झेनन् । अनि एमालेकै भ्रमणमण्डलको नेताका रूपमा भण्डारीले गत जेठ दोस्रो साता उत्तरी छिमेकी चीन पुगेर आउँदासम्म पनि पार्टीभित्र बहसको विषय बनेन ।

गत १२ जेठमा बेइजिङमा बोल्दै विद्या भण्डारीले मदन भण्डारीका सपनादेखि केपी ओली नेतृत्वमा अघि बढेको ‘समृद्ध नेपाल, सुखी नेपाली’ को चर्चा मात्रै गरिनन् उनले एमाले र चिनियाँ कम्युनिस्ट पार्टीबीच दशकौंदेखि जारी भाइचारालाई नयाँ उचाइमा कसरी वृद्धि गर्ने भन्नेबारे लामै बोलिन् ।

चीन भ्रमणको तेस्रो दिन पूर्व राष्ट्रपति भण्डारीलाई बेइजिङमा चिनियाँ कम्युनिस्ट पार्टी अन्तर्राष्ट्रिय विभाग प्रमुख ल्यु च्याशाओले स्वागत गरेका थिए ।

आईडीसीपीसी अर्थात् कम्युनिस्ट पार्टीको अन्तर्राष्ट्रिय विभागले डाकेका सबै पाहुना सीपीसीसँग भाइचारा सम्बन्ध भएका दक्षिण एसिया, पूर्वी एसिया, पूर्वी मध्य एसिया, उत्तरपूर्वी एसियाका पार्टीहरु थिए । भण्डारी त्यहाँ एमाले नेताकै रुपमा सहभागी थिइन् । मन्त्री दामोदर भण्डारी सहितका एमाले नेताहरु उनीसँग सहभागी थिए ।

२२ मिनेटको मन्तव्यमा भण्डारीले समृद्ध नेपाल सुखी नेपालीको एजेन्डा सफल पार्न चीन, सीपीसी र चिनियाँ जनताले सघाइरहेको भन्दै सराहना गरिन् । दुई पार्टीबीचको सम्बन्ध अझै अगाडि बढ्ने भण्डारीको मन्तव्यमा एमाले नेताकै भूमिका प्रस्तुत थियो ।

भण्डारीलाई दक्षिणी छिमेकी भारतको सत्तारुढ दल भारतीय जनता पार्टी (भाजपा) ले पनि एमाले नेताकै रुपमा निमन्त्रणा पठाइसकेको छ । उनी जाने, नजाने वा कहिले कसरी जाने भन्ने चाहिं निश्चित छैन ।

केही दिनअघि कांग्रेस नेता शेखर कोइरालाले उनलाई भेट्दा एमालेकै शीर्षस्थ नेताका रुपमा कुरा गरेका छन्, जहाँ आइन्दा दिनका राजनीतिक सम्भावनाबारे कुराकानी भएका छन् ।

पोहोर कात्तिकमा अनलाइनखबरसँग कुरा गर्दै भण्डारीले आफू एमालेमा अध्यक्ष बन्ने सम्भावना जीवितै रहेको दाबी गर्ने बेलासम्म उनको सदस्यता नवीकरण भइसकेको थियो ।

त्यसैको पुनरुक्ति गर्दै उनले गत १४ असार, अर्थात् मदन भण्डारीको जन्मजयन्तीका दिन आयोजित समारोहमा समेत आफ्नो पार्टी सदस्यता नवीकरण भइसकेको बताएकी थिइन् ।

यो पनि पढ्नुहोस

एमाले टोली नेता बनेर विद्या भण्डारीको उत्तरी उडान

एमाले महासचिव शंकर पोखरेलले समेत भण्डारीको पार्टी सदस्यता नवीकरण भइसकेको भनी केही दिनअघि बोलेका थिए, जसबारे आज च्यासल मुख्यालयमा वरिष्ठ उपाध्यक्ष ईश्वर पोखरेलले समेत पुन:पुष्टि गर्दै मुख खोले ।

र, सबैभन्दा मुख्य कुरा– प्रधानमन्त्री तथा पार्टी अध्यक्ष केपी शर्मा ओलीसँग च्यासलमा आज आइतबार झन्डै दुई घन्टा कुरा गरिसकेपछि भण्डारी आफैंले सदस्यता नवीकरण भइसकेको दोहोर्‍याइन् ।

तर एमालेभित्र केही नेताहरुले भण्डारीको पार्टी सदस्यता पेन्डिङमा रहेको दाबी गरेका छन् ।

प्रचार विभाग प्रमुख राजेन्द्र गौतमले पोलिटब्युरो बैठकपछि प्रेससँग बोल्दै शनिबार यस्तो दाबी गरेका थिए ।  पोलिटब्युरो बैठकको निर्णय सार्वजनिक गर्ने क्रममा गौतमले भण्डारीको सदस्यता नवीकरणबारे छलफल हुने बताए ।

‘अहिले नवीकरण पेन्डिङ अवस्थामा छ । धारा ८ र ९ आकर्षित भयो भनेपछि त्यो जहाँ छ, स्थगन अवस्थामा छ भन्ने बुझिन्छ’, उनले भनेका थिए । भण्डारीले राष्ट्रपति हुनलाई पार्टी सदस्यता त्यागेकाले नवीकरणबारे आवश्यक निर्णय गर्नुपर्ने गौतमले बताएका थिए ।

 गौतम मात्रै नभई एमालेका अध्यक्ष ओली निकट केही नेताहरुले भण्डारीको सदस्यता गत वर्ष नवीकृत भए पनि यस वर्ष विचाराधीन अवस्थामा रहेको दाबी गरेका छन् ।

भण्डारी स्वयंले आफ्नो सदस्यताको स्थितिबारे १४ असार र आज गरी दुईपल्ट दोहोर्‍याएर बोलेको, अनि चीन जाँदा एमाले नेताकै तर्फबाट प्रतिनिधित्व गरिसकेको अवस्थामा च्यासलमा नेताहरुले दिएको अभिव्यक्ति विवादमा परेको हो ।

सम्भवत: अध्यक्ष ओली आफैंले यसबारे धारणा दिने सम्भावना रहेको एमाले स्रोत बताउँछ ।

एमाले सचिव योगेश भट्टराईले भने यो विन्दुमा आएर सदस्यताको विवाद झिक्नु प्राविधिक प्रश्नमात्रै भएको बताएका छन् । अनलाइनखबरसँग आज दिउँसो कुरा गर्दै भट्टराईले पार्टी राजनीतिमा भण्डारी सक्रिय हुने भए सदस्यता मात्रैको विवादले अर्थ नराख्ने राय समेत दिए ।