अनुप र अस्मी ‘नेपाल्स नेक्स्ट टप मोडल’ को जजमा अनुबन्धित

News Summary

Generated by OK AI. Editorially reviewed.

पूर्वमिस नेपाल अस्मी श्रेष्ठ र अभिनेता अनुपविक्रम शाहीले 'नेपाल्स नेक्स्ट टप मोडल' पहिलो सिजनको जजमा अनुबन्धित भएका छन्।
हिमालय टिभीले उत्पादन गर्ने यो मोडलिङ रियालिटी शोमा अस्मी होस्टको रुपमा पनि रहनेछिन् भने बाँकी दुई जज आगामी साता घोषणा हुनेछन्।
शोमा १६ वर्षमाथिका मोडलले आवेदन दिन सक्नेछन्, सातै प्रदेशमा अडिसन हुनेछ र विजेताले १५ लाख नगद पुरस्कार पाउनेछन्।

काठमाडौं । पूर्वमिस नेपाल अस्मी श्रेष्ठ र अभिनेता अनुपविक्रम शाही मुलुकको पहिलो मोडलिङ रियालिटी शो ‘नेपाल्स नेक्स्ट टप मोडल’ पहिलो सिजनको जजमा अनुबन्धित भएका छन् ।

हिमालय टिभीसँग यी दुईजनाले सम्झौतापत्रमा हस्ताक्षर गरे । मोडलबीचको प्रतिस्पर्धा र उत्कृष्टलाई पुरस्कृत गरिने शैलीको यो टिभी कार्यक्रमलाई हिमालय टिभीले उत्पादन गर्न लागेको हो ।

पूर्वमिस नेपाल समेत रहेकी अस्मी यो कार्यक्रममा होस्टको रुपमा समेत हुनेछिन् । बाँकी दुई जज आगामी साता घोषणा हुने हिमालय टिभीका कार्यकारी निर्देशक श्याम कँडेलले जानकारी दिए ।

२० भागको पहिलो सिजनका हरेक एपिसोडमा विभिन्न क्षेत्रका चर्चित व्यक्ति गेस्ट जजको रुपमा हुनेछन् । मिस नेपालको जस्तै शैलीमा देश तथा विदेशबाट अडिसन आह्वान हुन्छ ।

१६ वर्षभन्दा माथिका मोडलले आवेदन दिन सक्नेछन् । अबको दुई सातामा आवेदन खुला गर्ने तयारी छ । सातै प्रदेशमा अडिसन गरिने र त्यहाँबाट २४ जना छनोट हुनेछन् ।

छनोट भएकाले प्रतिस्पर्धामा भाग लिनेछन् । छनोट भएकालाई विभिन्न टास्कमा प्रतिस्पर्धा गराइन्छ । हरेक साता एलिमिनेसन हुनेछन् । शोलाई ‘भ्वाइस अफ नेपाल’ फेम्ड लक्ष्मण पौड्यालले निर्देशन गर्नेछन् ।

शोका विजेताले १५ लाख नगद र विभिन्न ब्रान्डसँग इन्डोर्समेन्टको मौका पाउनेछन् ।