ट्रम्पसँगको वार्ताका लागि पुटिन अमेरिका प्रस्थान

News Summary

Generated by OK AI. Editorially reviewed.

रुसी राष्ट्रपति भ्ल्यादिमिर पुटिन नेतृत्वको प्रतिनिधिमण्डल अमेरिकी राष्ट्रपति डोनाल्ड ट्रम्पसँगको शिखर वार्ताका लागि अमेरिका प्रस्थान गरेको छ।
शिखर वार्ता अमेरिकी राज्य अलास्काको एंकोरेजमा शुक्रबार हुने र मुख्य विषय युक्रेन युद्ध रहने अपेक्षा गरिएको छ।
क्रेमलिनका प्रवक्ता दिमित्री पेस्कोभले ट्रम्प र पुटिनबीचको भेटपछि कुनै संयुक्त घोषणापत्र जारी नहुने बताएका छन्।

२९ साउन, काठमाडौं । अमेरिकी राष्ट्रपति डोनाल्ड ट्रम्पसँगको शिखर वार्ताका लागि रुसी राष्ट्रपति भ्ल्यादिमिर पुटिन नेतृत्वको प्रतिनिधिमण्डल अमेरिका प्रस्थान गरेको छ ।

अलास्कामा हुने शिखर वार्ताका लागि रुसबाट पुटिन नेतृत्वको टोली प्रस्थान गरेर अमेरिकी हवाई क्षेत्रमा प्रवेश गरिसकेको फ्लाइट ट्र्याकिङ प्लेटफर्म फ्लाइटराडार २४ले देखाएको हो ।

महाशक्ति राष्ट्रका दुई शिर्ष नेताबीच शुक्रबार अमेरिकी राज्य अलास्काको सबभन्दा ठूलो शहर एंकोरेजमा भेटवार्ता हुँदैछ ।

ट्रम्प र पुटिनको भेटवार्ता मुख्यत: युक्रेन युद्धका विषयमा केन्द्रित हुने अपेक्षा छ ।

यसैबीच क्रेमलिनले भने ट्रम्प र पुटिनबीचको भेटपछि संयुक्त घोषणापत्र जारी नहुने प्रतिक्रिया दिएको छ । क्रेमलिनका प्रवक्ता दिमित्री पेस्कोभले भोलि शुक्रबारको शिखर बैठकपछि कुनै दस्तावेज वा घोषणापत्र जारी हुने सम्भावना नभएको बताएका हुन् ।

उनले भने, ‘कुनै दस्तावेज जारी हुने अपेक्षा छैन, त्यसका लागि केही पनि तयारी गरिएको छैन ।’

उनका अनुसार ट्रम्पसँगको वार्तापछि पुटिनले संयुक्त पत्रकार सम्मेलनमार्फत समझदारी र सहमतिको खाका सार्वजनिक गर्नेछन् ।