२०८२ भदौ १२ गते १०:०४ 
News Summary
Generated by OK AI. Editorially reviewed.- पाटन उच्च अदालतले अखिल नेपाल फुटबल संघले पूर्वअध्यक्ष गणेश थापालाई फुटबल गतिविधिमा प्रतिबन्ध लगाउने निर्णय खारेज गरेको छ।
- अदालतले फिफाबाट १० वर्षको प्रतिबन्ध भुक्तान गरिसकेका थापामाथि पुनः कारवाही आवश्यक नरहेको निर्णय गरेको छ।
- अदालतले थापालाई फुटबल गतिविधिमा सहभागी हुन नपाउने कुनै पनि कारवाही नगर्न एन्फाको नाममा आदेश जारी गरेको छ।
१२ भदौ, काठमाडौं । अखिल नेपाल फुटबल संघ (एन्फा) का पूर्वअध्यक्ष गणेश थापालाई एन्फाले कुनै पनि फुटबल गतिविधिमा प्रतिबन्ध लगाउने निर्णय पाटन उच्च अदालतले खारेज गरिदिएको छ ।
पुर्व अध्यक्ष थापाको उजुरीमा उच्च अदालत पाटनले एन्फाले साउन ९ गते गरेको रोक लगाउने निर्णय न्यायको सिद्धान्त अनुसार नभएको भन्दै खारेज गरिदिएको हो ।
फिफाबाट १० वर्षको प्रतिबन्धको अवधि भुक्तान गरिसकेका थापालाई एन्फाका दुई समिति (एन्फा अनुशासन र सदाचार समिति) फुटबल गतिबिधिमा संलग्न हुन नपाउने गरि कारवाही गरेको थियो ।
अनुशासन समितिले वैशाख ४ मा र सदाचार समितिले वैशाख १६ मा एन्फाको विधानको धारा २४(३) ङ अनुसार थापालाई कुनै पनि फुटबलका गतिविधिमा भाग लिन नपाउने गरी निर्णय गरेको थियो ।
तर न्यायाधीश मुनिन्द्रराज अवस्थि र कृष्णराज कोइरालाको संयुक्त इजलासको फैसलाले फिफाको कारवाहही भोगिसकेको हुँदा थापामाथि त्यसै विषयमा फेरि अर्को कारवाही आवश्यक नरहेको अदालतले निर्णय गरेको हो ।
साथै थापालाई फुटबल गतिविधिमा सहभागी हुन नपाउने कुनै पनि काम कारबाही नगर्नू र नगराउन पनि अदालतले एन्फाको नाममा आदेश जारी गरेको छ ।
अदालतले दिएको अन्तरिम आदेशविपरीत वैशाख २६ गते काभ्रेको धुलिखेलमा भएको एन्फा साधारणसभामा आफूलाई रोक लगाएकोमा थापाले अदालतको अवहेलनासम्बन्धी रिट हालेका थिए ।
तर दावी नपुगेको भन्दै अदाललते उक्त रिट खारेज गरिदिएको थियो ।
प्रतिक्रिया 4