भदौ महिनाको बाँकी १५ दिनमा प्रतिनिधिसभाको बैठक ५ दिन बस्ने

१३ भदौ, काठमाडौं । भदौ महिनाको बाँकी १५ दिनमा प्रतिनिधिसभाको बैठक ५ दिन बस्ने गरी क्यालेन्डर तयार भएको छ ।

सभामुख देवराज घिमिरेले प्रमुख राजनीतिक दलका प्रमुख सचेतकहरूसँगको छलफलमा पाक्षिक क्यालेन्डर तय गरेका हुन् । जसमा भदौ महिनाको १५ गतेदेखि ३० गतेसम्ममा जम्मा ५ दिन बैठक बस्ने उल्लेख छ ।

क्यालेन्डर अनुसार भदौ १८ गते, १९ गते, २५ गते, २६ गते र २७ गते प्रतिनिधिसभाको बैठक बस्ने छ ।

यो अवधिमा महत्वपूर्ण विधेयकहरू अगाडि बढाउने कार्यसूची छ ।

भदौ १८ गते बस्ने प्रतिनिधिसभाको बैठकले नागरिकतासम्बन्धी विधेयक पारित गर्नेछ ।

संघीय निजामती सेवा विधेयक यही भदौ १९ गते प्रतिनिधिसभाबाट पारित गरिनेछ । यो विधेयक यसअघि १५ असार २०८२ मा प्रतिनिधिसभाबाट पास भएर राष्ट्रिय सभामा गएको थियो । राष्ट्रियसभाले यही भदौ १६ गतेभित्र प्रतिनिधिसभामा उक्त विधेयक फिर्ता गरिसक्नुपर्छ ।

राष्ट्रियसभाबाट फिर्ता आएपछि भदौ १९ गते निजामती सेवा विधेयक पारित गरेर सभामुख हुँदै राष्ट्रपतिकहाँ पठाउने तयारी छ । राष्ट्रपतिले प्रमााीकरण गरेपछि ऐनका रुपमा कार्यान्वयनमा आउँछ ।

यस्तै सभामुख र पाँच राजनीतिक दलका प्रमुख सचेतक र सचेतकहरूको बैठकले यही भदौ २६ गते विद्यालय शिक्षा विधेयकलाई पारित गर्ने सम्भावित क्यालेन्डर तय गरेका छन् ।

विद्यालय शिक्षा विधेयक यही भदौ ५ गते संसदीय समिति (शिक्षा, स्वास्थ्य तथा सूचना प्रविधि समिति)ले पास गरेर भदौ ६ गते प्रतिनिधि सभामा विधेयकको प्रतिवेदन पेस गरेको छ ।

यसलाई भदौ २६ गते पास गरेर राष्ट्रिय सभामा पठाउने गरी प्रतिनिधिसभाले सम्भावित कार्यतालिका तय गरेको हो ।