उखु किसानका मागमा सरकार गम्भीर बनेन : शक्ति बस्नेत

News Summary

Generated by OK AI. Editorially reviewed.

नेकपा माओवादी केन्द्रका सांसद शक्ति बस्नेतले सरकार उखु किसानका मागप्रति गम्भीर नदेखिएको बताएका छन्।
सांसद बस्नेतले गत वर्षको एक अर्ब ५० करोडभन्दा बढी रकम सरकारले भुक्तानी नगरेको र अनुदान ७० रुपैयाँबाट ३५ रुपैयाँ कायम गरेको आरोप लगाए।
उनले किसानको मागअनुसार बाँकी भुक्तानी तत्काल गर्न, अनुदान यथावत राख्न र उखुको समर्थन मूल्य तोक्न सरकारलाई आग्रह गर्नुभयो।

१३ भदौ, काठमाडौं । नेकपा माओवादी केन्द्रका सांसद शक्ति बस्नेतले उखु किसानका मागप्रति सरकार गम्भीर नदेखिएको बताएका छन् ।

शुक्रबार प्रतिनिधिसभाको बैठकमा सांसद बस्नेतले उखु किसानले पाउनुपर्ने गत वर्षकै एक अर्ब ५० करोड भन्दा बढी रकम सरकारले भुक्तानी नगरेको भन्दै उनले सरकार किसानप्रति अनुदार देखिएको बताएका हुन् ।

प्रति क्विन्टल उखुमा पाउँदै आएको ७० रुपैयाँ अनुदान समेत सरकारले घटाएर ३५ रुपैयाँ कायम गरेर किसान विरोधी निर्णय गरेको उनको आरोप छ ।

‘सरकारको यो जनविरोधी रवैयाविरुद्ध किसानहरू केहीदिन देखि वर्षा र तीज लगायतका पर्वको प्रवाह नगरी सडकमा धर्ना र प्रदर्शन गरिरहेका छन्, तर सरकार उनीहरूको आवाज र मागप्रति गम्भीर देखिँदैन,’ उनले भने ।

किसानले पाउनुपर्ने गतवर्षको बाँकी भुक्तानी तत्काल गर्न र अनुदान रकम यथावत राख्न उनको माग छ ।

उखु खेतीमा किसानलाई प्रोत्साहित गर्ने उखुको समर्थन मूल्य तोक्न समेत उनले माग गरे । उखु तौलिने बेलामै अनुदान र भुक्तानी दिने गरी व्यवस्था मिलाउन र चिनीमा आत्मनिर्भर बन्ने योजना बनाउन सांसद बस्नेतले सरकारको ध्यानाकर्षण गराए ।