‘चीनसँग जीएसआईबारे कुरै भएको छैन’

प्रधानमन्त्रीको भ्रमणको मूल कार्यक्रम आज सकियो । यो भ्रमण कस्तो रह्यो ?

भ्रमण पूर्ण रुपमा सफल भयो । अन्तर्राष्ट्रिय मञ्चमा प्रधानमन्त्रीले नेपालको स्ट्याण्ड र विचारहरु प्रस्ट रुपमा राख्नुभयो । त्यसैले हामीले भ्रमण पूर्ण रुपमा सफल भएको ठानेका छौं ।

चीनका राष्ट्रपतिले आज ‘ग्लोबल गभर्नेन्स इनिसएटिभको घोषणा गरे । यो अभियानलाई कसरी लिनुभएको छ ?

ग्लोबल गभर्नेन्स इनिसिएटिभ चाहिँ आज प्रपोज गरेको अभियान हो । विभिन्न देशहरुले त्यसबारेमा सम्मेलनमा कमेन्ट गरेका छन् । केहीले गरेनन् । हामीले पनि छलफल गरेरपछि धारणा बनाउने कुरा हो।

सी चिनफिङसँगको गत शनिबारको भेटमा नेपालले चीनको सुरक्षा रणनीति ‘ग्लोबल सेक्युरिटी इनिसिएटिभ’मा समर्थन जनायो भन्ने विज्ञप्ति जारी भएको थियो । त्यसलाई लिएर अहिले बहस भइरहेको छ । जीएसआईमा नेपाल संलग्न हुनेबारे के कुरा भएको हो ?

जीएसआईको बारेमा न हाम्रो प्रधानमन्त्रीले आफ्नो कुराकानीमा व्यक्त गर्नुभयो, न द्विपक्षीय कुराकानीमा त्यो विषय आयो । सार्वजनिक रुपमा पनि कसैले केही भनेको छैन । नेपालको पहिलेदखि नै एउटा स्ट्याण्ड छ, नेपाल कुनै पनि सैन्य गठबन्धनमा सामेल हुँदैन । त्यो स्ट्याण्डमा अहिले पनि कायम छ ।

चीनको विज्ञप्तिमा त्यो कुरा कसरी आयो त ?

चिनियाँ साइडबाट आएको विज्ञप्तिमा कसरी पर्‍यो त्यो हामीलाई के थाहा र ?  हाम्रो तर्फबाट त्यस विषयमा कुनै कुराकानी भएको छैन । प्रधानमन्त्रीले जीएसआई भन्ने शब्द पनि उच्चारण गर्नुभएको छैन ।

अब यो विज्ञप्तिमा आएको विषयलाई लिएर अब नेपाल पक्षाबाट कुनै कन्सर्न जनाइन्छ ?

हामीले त्यस विषयमा कुनै कुरा गरेको छैन । कुरा नगरेको विषयमा हामीले कन्सर्न जनाउने कुरा भएन । नेपाल पहिला पनि त्यस्तो गठबन्धनमा सामेल भएको छैन । अहिले पनि हुँदैन । नेपालको पोजिसेन त क्लियर छ नि ।

बेइजिङमा अझै एउटा द्विपक्षीय भेट बाँकी नै छ । त्यो भेटमा चाहिँ अहिले असष्पष्ट भएका जीएसआई लगायतका विषयमा केही कुरा हुन्छ ?

हामीले चीनसँगको द्विपक्षीय सम्बन्धलाई बलियो बनाउने हो । हाम्रो देशको हितमा हाम्रो परराष्ट्र नीतिलाई सञ्चालन गर्ने हो । नेपालले आफ्नो विकासको चाहनालाई ध्यान दिएको छ । त्यही कुरालाई प्राथमिकतामा राखेर छलफल हुन्छ ।

लिपुलेकको विषयमा नेपालले कुरा राख्दा सी चिनफिङबाट चाहि कस्तो प्रतिक्रिया आयो ?

हामीले हाम्रो कुरा राख्यौं । नेपालले हाम्रो भूमि हो भनेर राख्यौं । त्यही हो कुरा ।

लाओस कम्बोडिया, मालदिभ्स लगायतका देशका सरकार प्रमुखहरुसँग पनि भेट भयो । त्यो भेटमा चाहिँ के कुरा भयो ?

त्यसमा द्विपक्षीय सम्बन्धलाई कसरी बलियो बनाउने भन्ने कुरा भएको हो । सांस्कृतिक आर्थिक सम्बन्धलाई विस्तारित सुदृढ गरौं भन्ने कुरा नै भयो । देशअनुसारका आवश्यकताका कुराकानी भए।